ATƏT-in Minsk qrupunun bundan sonrakı taleyi necə olacaq? - AÇIQLAMA

1992-ci ildə Dağlıq Qarabağ münaqişəsinin həll edilməsi məqsədi ilə yaradılan ATƏT-in Minsk qrupu 30 il ərzində sözdə işğalı pisləsə də, əməldə ötən ilin sentyabr ayının 27-nə qədər mövcud olan status-kvonun saxlanılması üçün çalışıb. Bu gün isə Dağlıq Qarabağ münaqişəsi Azərbaycanın öz hərbi gücü hesabına həll olunub. Əgər artıq münaqişə həll edilibsə, işğalçını dəstəkləyən ATƏT-in Minsk Qrupunun fəaliyyəti kimə lazımdır? Hətta bu gün ATƏT-in Minsk Qrupunun ləğv edilməsi ilə bağlı fikirlər səsləndirənlər də var. ATƏT-in Minsk Qrupu ləğv edilə bilərmi?

Bununla bağlı Sonxeber.az-a danışan deputat Cavid Osmanov bildirib ki ATƏT-in Minsk Qrupu artıq tarixə qovuşan Dağlıq Qarabağ münaqişəsinin həll edilməsi üçün yaradılan institut idi:

"Lakin ATƏT-in Minsk Qrupu 30 il ərzində bu problemin həll edilməsi istiqamətində yarıtmaz fəaliyyət göstərdi. ATƏT-in Minsk Qrupu və digər beynəlxalq təşkilatların fəaliyyətsizliyindən səbir kasası dolub-daşan Azərbaycan ordusu 44 gün davam edən Vətən müharibəsində Ali Baş Komandanın rəhbərliyi ilə ərazi bütövlüyümüzün bərpası üçün BMT Təhlükəsizlik Şurasının qəbul etdiyi və illərdir ki, yerinə yetirilməyən 4 qətnaməni özü icra etdi. Dağlıq Qarabağ münaqişəsi tarixə qarışdığı üçün ATƏT-in Minsk Qrupunun bundan sonrakı hər hansı fəaliyyəti bizə maraqlı deyil. Cənab Prezident özü də vurğuladı ki, Qarabağ münaqişəsi artıq tarixə qovuşduğu üçün indiki mərhələdə ATƏT-in Minsk Qrupunun hansı işlə məşğul olacağı sual altındadır. Ona görə də düşünürəm ki, ATƏT-in Minsk Qrupu ləğv edilməlidir".

Sosial Tədqiqatlar Mərkəzinin Mətbuat Xidmətinin rəhbəri, beynəlxalq məsələlər üzrə mütəxəssis Əziz Əlibəyli isə vurğulayıb ki, bu gün ATƏT-in Minsk Qrupunun ləğv edilməsi inandırıcı deyil:

"ATƏT-in Minsk Qrupunun əsas missiyası hazırda Azərbaycanın öz hərbi gücü ilə həll etdiyi Dağlıq Qarabağ probleminin danışıqlar yolu ilə həll edilməsi istiqamətində töhfə vermək idi. 30 il ərzində onlar münaqişənin həll olunması istiqamətində yalnız "Paket variantı", "Ümumi dövlət" kimi planlar təklif etdilər. Lakin bu təkliflərin hər biri ərazi bütövlüyümüzün bərpasına zərbə olduğu üçün qəbul edilmədi. Vətən müharibəsi zamanı 3 həmsədr ölkənin ayrı-ayrılıqda fəaliyyəti bir daha göstərdi ki, onların məqsədi mövcud status-kvonu qoruyub, saxlamaqdır. Əslində öz ölkəsində erməni lobbisini gücləndirən ölkələrin Azərbaycanın mənafeyinin müdafiəsi yönündə addım atması inandırıcı deyil".

Politoloq söyləyib ki, 44 günlük Vətən müharibəsi bir daha göstərdi ki, bu ölkələrin, xüsusilə də Fransanın 30 illik fəaliyyəti sadəcə işğalçını dəstəkləmək olub:

"Həmin 3 həmsədr ölkənin səfirlərinin bu yaxınlarda Şuşaya getməkdən imtina etməsi onların fəaliyyətinin əsas mahiyyətini ortaya qoydu. Əslində bu, həm də diplomatik kobudluq və milli maraqları heçə saymaqdır. Ona görə də düşünürəm ki, ATƏT-in Minsk Qrupunun fəaliyyətinin bu cür passiv qalması bütün tərəflər üçün əlverişlidir. Zamanı gələndə, yəqin ki, cənab Prezidentin təklif etdiyi "3+3", yəni Azərbaycan, Gürcüstan, Türkiyə, İran, Ermənistan və Rusiya birgə formatı qurulacaq. Bu o deməkdir ki, regiona başqa ölkələr buraxılmasın və bu dövlətlər arasında iqtisadi əməkdaşlıq formatı qurulsun. Hesab edirəm ki, bu yolla bölgədəki bütün problemləri həll etmək mümkündür. Bu gün birtərəfli olaraq ATƏT-in Minsk Qrupundan imtina etsək, digər dövlətlərin təzyiqi ilə qarşılaşa bilərik".

Aytəkin Cəlali

Telegramda izləyin

instagramda izləyin