"Sülhməramlılar ora öhdəliklərini yerinə yetirməyə yox, bizimlə "məzələnməyə" gəliblər" - Millət vəkili

Ötən ilin sentyabr ayının 27-də 44 günlük Vətən müharibəsi Azərbaycanın qələbəsi və ərazi bütövlüyünün bərpası ilə nəticələndi. Qarabağda hərbi əməliyyatların dayandırılması üçün Azərbaycan Prezidenti İlham Əliyev, Ermənistanın Baş naziri Nikol Paşinyan və Rusiya Prezidenti Vladimir Putin tərəfindən üçtərəfli bəyannamə imzalandı. Bu bəyannaməyə uyğun olaraq, bölgədə sülhün qorunması Rusiya və Türkiyə sülhməramlılarına tapşırılıdı. Lakin Tovuz, Şuşa, Naxçıvan, Ağdam və Kəlbəcər istiqamətində Ermənistan silahlı qüvvələri tərəfindən atəşkəsin pozulması Rusiya sülhməramlılarının 10 noyabr bəyannaməsinə uyğun olaraq sülhün qorunması istiqamətində üzərlərinə götürdükləri öhdəliyi lazımınca yerinə yetirmədiklərini göstərir. Əgər bölgədə atəşkəsə nəzarət edib, erməni silahlı qüvvələrini Azərbaycan ərazilərindən çıxara bilmirlərsə, o zaman Rusiya sülhməramlılarının Qarabağda nə işi var?

Məsələ ilə bağlı Sonxeber.az-a açıqlama verən deputat Aqil Abbas bildirib ki, Rusiya sülhməramlılarının yerləşdiyi ərazidə erməni silahlı qüvvələrinin Azərbaycan ordusuna atəş açması bizdə müəyyən sualların yaranmasına səbəb olur:

"Ötən il noyabrın 10-da imzalanan bəyannaməyə uyğun olaraq, Rusiya sülhməramlıları Azərbaycan torpaqlarındakı Ermənistan silahlı qüvvələrini çıxarmalı idilər. Amma son bir neçə gündə baş verənlər onu göstərir ki, Qarabağda hələ də erməni diversantları qalmaqdadır. Belə çıxır ki, sülhməramlıları ora ona görə yerləşdiriblər ki, biz atəş aça bilməyək və ermənilər də rahat şəkildə bizimlə "məzələnsinlər". Belə olan halda Rusiya ordusu Qarabağa sülhməramlı məqsədlə gəlməyib. Sülhməramlılar ora öhdəliklərini yerinə yetirməyə yox, bizimlə "məzələnməyə" gəliblər. Bu gün hələ də Qarabağda Ermənistanın silahlı qüvvələri qalmaqdadır. Hesab edirəm ki, biz Rusiya sülhmərəmlılarının qarşısına 10 noyabr bəyannaməsinə əməl etmələri üçün şərt qoymalı və, lazım gələrsə, Laçın dəhlizini də bağlamalıyıq. Əgər sülhməramlılar bəyannamənin şərtlərinə əməl etmirlərsə, ərazilərimizdən çıxıb getsinlər".

Aytəkin Cəlali

Telegramda izləyin

instagramda izləyin