"Narkotik aludəçilərindən əvvəl, pul qarşılığında narkotiki himayə edən vəzifəlilər həbs olunsun" - Deputat

"Narkotiki istifadə edənlərdən əvvəl, narkotiki himayə edənləri həbs etmək lazımdır".

Bunu Sonxeber.az-a açıqlama verən deputat Fazil Mustafa deyib.

O bildirib ki, bu mövzuya hər kəs prinsipial yanaşmalıdır:

"İndiyə qədər çox eşitmişik ki, vəzifəli şəxslərin çoxu narkotik aludəçisidir və yaxud da narkotiki himayə edir. Ona görə də ilk növbədə bu cür şəxslərin üzərinə getmək lazımdır. Bu, elə bir problemdir ki, sıradan insanlar işin arxasında durub himayə edə bilməz. Əgər narkotiki himayə edən qüvvələrə pul təslim edilməsə, heç vaxt bu qədər yayıla bilmzədi. Sözügedən məsələdə səlahiyyət sahibi olan, bu prosesin içində yer alan hər bir şəxsin əməli aşkara çıxarılmalı və onların məsuliyyətə cəlb olunması təmin olunmalıdır.

Narkotik maddə satan şəbəkəni hər kəs bilir və bu şəbəkənin də çökdürülməsi üçün bütün dövlət orqanları birlikdə ciddi tədbir görməlidir. Bu işi tək polisin üzərinə qoymaq olmaz. Polis onsuz da əlindən gələni edir. Daxili İşlər Nazirliyinin rəhbərliyi də bu istiqamətdə çox ciddi addımlar atır. Məsələ daha çox cəmiyyətlə bağlıdır. Digər qurumların hamısı səfərbər olmalıdır ki, bu bəladan cəmiyyətimizi qurtaraq.

Təəssüf ki, bu istiqamətdə mənfi proseslər davam edir. Bir çox hallarda da məlum olur ki, hansısa tanınan şəxslər bunun aludəçisidir. İstər musiqiçi, istər yazar, yaxud bloqer olsun - onların başını sığallamaqla məsələ yekunlaşmır. Ciddi şəkildə narkotik bəlası cəmiyyətdə yayılır. Narkotik aludəçisi olan qadınların da cəmiyyətdə tanınması məsələsi var.

Çox tez-tez eşidilir ki, hansısa vəzifəli şəxsin qohumu narkomandır, amma onu 20-30 ildir ki, gizlədirlər. Belə insanlar "toxunulmaz" olduqlarına görə istənilən vaxt ətrafa bu bəlanı yaya bilirlər. Cəmiyyəti narkomaniyadan xilas etmək üçün hər kəs prinsipial mövqe tutmalıdır".

Aytəkin Cəlali

Telegramda izləyin

instagramda izləyin