Qarabağda hərbi əməliyyatlar yenidən başlaya bilər? - AÇIQLAMA
Son bir neçə gündür ki, Ermənistanın təxribatları davam edir. Belə ki, iyulun 26-sı, saat 03:00 radələrindən başlayaraq Ermənistan silahlı qüvvələrinin bölmələri Basarkeçər rayonu ərazisindəki müxtəlif istiqamətlərdə yerləşən döyüş mövqelərindən Azərbaycan ordusunun Kəlbəcər rayonu ərazisindəki mövqelərini atıcı silahlar və qumbaraatanlardan intensiv atəşə tutub. Qeyd edək ki, Ermənistanın son günlər Kəlbəcər istiqamətində törətdiyi təxribatlar nəticəsində hərbi qulluqçumuz, gizir Yaqublu Fərman Telman oğlu şəhid olub. Əgər Ermənistan təxribatlarına davam etsə, yenidən hərbi əməliyyatlar başlaya bilərmi?
Bununla bağlı Sonxeber.az-a deputat Ceyhun Məmmədov danışıb:
"Bir neçə gündür ki, Ermənistan ordusu Kəlbəcər istiqamətində Azərbaycan silahlı bölmələrinin mövqelərini atəşə tutur. Ermənistanın təxribatı nəticəsində bir hərbi qulluqçumuz şəhid olub. Bu, bir daha onu göstərir ki, Ermənistan real vəziyyəti dərk etmir. Ermənistan hələ də Azərbaycanla düşmən münasibətlərini davam etdirir. Onlar 44 günlük Vətən müharibəsində uğradıqları ağır məğlubiyyətdən nəticə çıxarmayıblar. Azərbaycan ordusu Ermənistan tərəfinin hər bir təxribatına layiqli cavab verir.
Qeyd edim ki, atəşkəslə bağlı xahişi Ermənistan tərəfi etmişdi. 10 noyabr bəyannaməsi də Ermənistan rəhbərliyinin yalvarışlarından sonra imzalanıb. Belə ki, Ermənistan özü müraciət edərək kapitulyasiya aktına imza atdı. Ancaq Ermənistanın Azərbaycan bölmələrinə atəş açması bu ölkənin məkrli niyyətindən xəbər verir. Ermənistanın bütün təxribatlarının qarşısı alınır, bundan sonra da alınacaq. Bu təxribatlar əslində Ermənistanın təlaş içində olmasından və hakimiyyətdəki müəyyən boşluqlardan xəbər verir. Ermənistan konkret mövqe ortaya qoymalıdır. Sülh müqaviləsinə imza ataraq, Azərbaycanın ərazi bütövlüyünü tanımalı və atəşə son qoymalıdır".
Deputat vurğulayıb ki, Ermənistan təxribatlarına davam etsə, yenidən Azərbaycan ordusunun qətiyyətli addımı ilə qarşılaşacaq:
"Biz müharibəni Ermənistan məğlubiyyətindən nəticə çıxarsın deyə dayandırdıq. Amma bu gün bunu görmürük. Bu baxımdan Azərbaycan bütün zəruri addımları atacaq. Beynəlxalq təşkilatlar qarşısında da zaman-zaman məsələ qaldırılır. Əgər Ermənistan müharibə etmək istəyirsə və bu kimi təxribatlara davam edəcəksə, qarşılığını beşqat alacaq. Bu gün Azərbaycan Silahlı Qüvvələri tam hazır vəziyyətdədir və yenidən müharibə olsa, Ermənistanın iflic olmuş ordusunu darmadağın edəcək. Ermənistan bu təxribatları ilə növbəti yalnışlığa yol verir.
Hesab edirəm ki, növbəti günlərdə də Ermənistan təxribatlarına davam edərsə, Azərbaycanın daha sərt cavabı ilə qarşılaşacaq və sərt şəkildə cəzalandırılacaq. Ermənistan 44 günlük Vətən müharibəsindən nəticə çıxarmalı və təxribatlarına son qoymalıdır. Əks halda təxribatlarının ağır cavabını alacaq.
Bu gün cənab Prezident İlham Əliyevin qətiyyətli iradəsi və mövqeyi ortadadır. Azərbaycan torpaqlarını azad edəcək, bütün məqsəd və hədəflərinə uğurla çatacaq".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş