"İki qüdrətli dövlətin Azərbaycanın yanında olması gücümüzə qüc qatır" - Deputat
Xəbər verdiyimiz kimi, iyulun 27-də Azərbaycan, Türkiyə və Pakistan parlamentlərinin üçtərəfli iclasının yekunu olaraq, Bakı Bəyannaməsi imzalanıb. Bəyannaməni Milli Məclisin sədri Sahibə Qafarova, Türkiyə Böyük Millət Məclisinin sədri Mustafa Şentop, Pakistan İslam Respublikası Milli Assambleyasının sədri Əsəd Qeysər imzalayıblar.
Bununla bağlı Sonxeber.az-a danışan deputat Nəsib Məhəməliyev bildirib ki, Azərbaycan-Türkiyə-Pakistan parlament sədrlərinin imzaladığı Bakı Bəyannaməsi üç ölkənin qanunverici orqanları arasında yeni formatdır və tarixi hadisə hesab olunur:
"Bəyannamənin hərbi-siyasi əhəmiyyətinə gəldikdə, 44 günlük Vətən müharibəsində bunun real nəticələrinin şahidi olduq. Müharibə dövründə Bakının küçələrində Azərbaycan və Türkiyə bayraqları ilə yanaşı, Pakistan bayraqları da dalğalanırdı. Hər iki dövlət ilk gündən ölkəmizin yanında olduğunu bəyan etdi və bir neçə istiqamətdən gələn təhdidlərin cavabını qətiyyətlə verərək, Ermənistanı dəstəkləyən qlobal güclərin neytrallaşdırılmasında mühüm rol oynadı.
Son günlər bizə özlərini "qəhrəman" kimi sırımaq istəyənlərə Pakistanın Baş Naziri, Azərbaycan xalqının dostu İmran Xanın cavabları tam yerində oldu və heç zaman unudulmayacaq. Eyni ilə həmin mövqeni Şərqi Aralıq dənizi ətrafında gedən regional məsələlərdə Pakistan qardaş Türkiyəyə qarşı da göstərib. Pakistan nüvə silahına malik yeganə müsəlman dövlətidir, beynəlxalq münasibətlər və təhlükəsizlik sistemində xüsusi çəkiyə malikdir. Bu ölkənin güclü ordusu, hərbi-sənaye kompleksi mövcuddur.
Türkiyə də nəinki regional, eyni zamanda qlobal siyasətdə aktiv rol alan, sözünü demiş ölkədir. Belə ki, Türkiyənin Orta Şərqdə, Afrikada, Avropada apardığı siyasət beynəlxalq hüquqa, ədalətə söykənir. Bundan əlavə, Türkiyə hər zaman əzilmiş xalqları müdafiə edib".
Deputat vurğulayıb ki, Azərbaycanla hər iki ölkənin sənaye strukturları arasında ciddi əməkdaşlıq mövcuddur:
"Hərbi kadrların hazırlanması, birgə istehsal sahələrinin yaradılması nəzərdə tutulur. İqtisadi-ticari əməkdaşlıq, elmin, təhsilin, texnologiyaların inkişafı, mədəni əlaqələrin genişləndiriməsi istiqamətində addımlar atılır. Zəngəzur dəhlizi açıldıqdan sonra Pakistan-Türkiyə nəqliyyat-logistika əməliyyatları daha intensiv xarakter alacaq. Türkiyə və Pakistan kimi iki qüdrətli dövlətin Azərbaycanın yanında olması gücümüzə qüc qataraq beynəlxalq müstəvidə nüfuzumuzu artırır. Üç qardaş ölkənin yeni formatda əməkdaşlığı tarixi zərurətdir və cənab Prezident İlham Əliyevin uzaqgörən, düşünülmüş xarici siyasətinin nəticəsidir. Bu əməkdaşlığın daha sıx şəkildə aparılması üçün müvafiq qanunvericilik bazasının yaradılması isiqamətində Azərbaycan Milli Məclisi öz üzərinə düşən vəzifələri vaxtında icra edəcək".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş