Azərbaycanda övladlarını təhsildən yayındıran valideynlər həbs edilə bilər? - AÇIQLAMA
İstiqamət: Gender, ailə və demoqrafiya məsələlərinin işıqlandırılması
Yetkinlik yaşına çatmayan qızların ailələri tərəfindən məcburi evləndirilməsi bütün zamanlar üçün aktual olub. Gündən-günə qloballaşan dünyamızda əfsus ki, 15 yaşında yeniyetməni ailə həyatı qurmağa təhrik edən valideynlər var. Təzadlı vəziyyət bununla da yekunlaşmır. Sözügedən valideynlər övladlarını ailə sahibi kimi görmək istədiyindən onları təhsildən də yayındırırlar. Qeyd edək ki, son günlər Azərbaycanın bir neçə bölgəsində 15-16 yaşlı yeniyetmə qızların erkən yaşda nikaha cəlb edilməsi ilə bağlı xəbərlər gündəmdən düşmür. Bəs övladlarını təhsildən yayındıran valideynlərin azadlıqdan məhrum edilməsi məsələsi aktuallaşa bilərmi?
Mövzu ilə bağlı Sonxeber.az-a açıqlama verən hüquq müdafiəçisi Novella Cəfəroğlu bildirib ki, nikah yaşına çatmayan qızları molla kəbini ilə evləndirmə ənənəsi hələ də davam edir:
"Erkən yaşda nikahla bağlı qanun mövcud olsa da, tətbiq edilməsi üçün ictimai qınağın güclənməsi mütləqdir. Bu cür ailə həyatı quran qızlar ailə münaqişəsi baş verən zaman çarəsiz vəziyyətdə qalırlar. Çünki qızın nə təhsili, nə də rəsmi nikahı olur. Ona görə də yeniyetmələri təhsildən yayındırmaq olmaz.
Rayon və kənd məktəblərində keçirilən monitorinqlərin nəticəsi onu göstərir ki, nəinki qızlar, heç oğlanlar da məktəbə getmir. Bu, yolverilməz hal olmaqla yanaşı, cinayət məsuliyyəti də daşıyır. Əksinə, valideynlər özləri qız uşaqlarını ali təhsil almağa təhrik etməlidirlər. Bu halda gələcəkdə qarşılaşdıqları uğursuzluqlar zamanı öz ayaqları üstündə durmaq imkanları olacaq".
Deputat Jalə Əliyevanın sözlərinə görə, övladlarını erkən yaşda nikaha məcbur edən və onları bu yolla təhsildən yayındıran valideynlərə cinayət məcəlləsinin müvafiq maddələri ilə cəza və cərimələr tətbiq olunur:
"Qanunda edilən yeni dəyişikliyə əsasən, bir sıra məcburi halları nəzərə alaraq, nikah yaşı 17-ə qədər enə bilər. Buna valideynlərdən birinin və ya ikisinin ağır xəstə olması, həmçinin, ailədaxili itkilər aiddir. Ancaq görünən odur ki, bəzi valideynlər dövlətin qəbul etdiyi bu qərardan sui-istifadə edirlər. Əgər bu hallar artmağa davam edərsə, cəzalarda sərtləşdirilmə olacaq.
Unutmayaq ki, təhsil üzərində qurulan ailələr həm sağlam olur, həm də o ailədə dünyaya gətirilən uşaqların gələcəyi daha güclü sütunlar üzərində qurulur.
Məlumdur ki, dövlət bu yolda xüsusi qaydalar, qanunlar qoymaqla yanaşı maarifləndirmə tədbirləri də aparır. Ancaq cəmiyyətimizdə ictimai qınağın qanunlardan daha təsirli olduğunu nəzərə alsaq, deyə bilərik ki, məsələnin həllinin digər yolu da həmin valideynlərin ictimai qınağa tuş gəlmələridir".
Günel ABBAS
Material Azərbaycan Respublikası
Medianın İnkişafı Agentliyinin maliyyə
dəstəyi ilə hazırlanmışdır.
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş