"Koronavirus xəstəsi olan anamı öldürdülər, baş həkim məni qovdu" - Xəstəxanadan ŞİKAYƏT

Daha bir xəstəxanada xəstələrə baxılmaması ilə bağlı narazılıq var. Bu dəfə şikayət tibb işçilərinin biganəliyindən və bunun xəstələrin ölümünə səbəb olmasındandır.

Belə ki, Şəkərova Gülnar adlı vətəndaşın Sonxeber.az-a bildirdiyi şikayətində deyilir:

"Mənim anam Talıbova Gülnarə koronavirusa yoluxmuşdu. Onun vəziyyəti ağırlaşdığı üçün avqustun 27-də Sumqayıt şəhərində 45 nömrəli xəstəxanaya yerləşdirdik. Anamla tez-tez əlaqə saxlayırdım. Hər dəfə ona baxılmadığından şikayətlənir, onu oradan aparmağımı istəyirdi. Daha sonra xəstəxananın baş həkiminə bununla bağlı iradımı bildirdim. Həmin vaxt Həsən həkim məni ələ saldı və otağından qovdu. Sentyabr ayının 3-də mənə zəng edib anamın ölüm xəbərini verdilər. Anam sağlam, deyib-gülən qadını idi. Ona baxmadıqları üçün öldü. Tək mənim anama yox, orada heç bir xəstəyə baxılmır. Hər gün insanlara nə qədər meyit təhvil verirlər. Hamısı da həkimlərin məsuliyyətsizliyi ucbatından olur. Sanki insanları qəsdən öldürüb, say artırırlar".

Məsələ ilə bağlı qarşı tərəfin mövqeyini öyrənməyə çalışsaq da, zəngimizə cavab verən olmadı.

Qeyd: Qarşı tərəfin mövqeyini dərc etməyə hazırıq.

Aytəkinn CƏLALİ

Telegramda izləyin

instagramda izləyin