Xaricdə 100-ə yaxın kurs və təlim, mükafatlar... - Yubileyi olan Nihad Əliyevi siz də tanıyın

Bu gün şərəfli və faydalı ömür yolu keçən, insanların sağlamlığını ləyaqətlə qoruyan savadlı mütəxəssis, gözəl insan və qayğıkeş həkim-stomatoloq, cərrah-implantoloq-ortoped Nihad Əliyevin 50 yaşı tamam olur.

Sonxeber.az kollektivi Nihad həkimi yubileyi münasibəti ilə ürəkdən təbrik edir, ona uzun ömür, möhkəm cansağlığı, firavan həyat, ailə səadəti və hərtərəfli uğurlar arzu edir.

Nihad həkim öz davranışı, dürüstlüyü, qayğıkeşliyi və insanlara sağlamlıq, eləcə də gözəl təbəssüm bəxş etmək məharəti ilə onların etibarını və rəğbətini qazanan həkimlərdəndir.

Pasiyentlərin diliylə desək, həm qəlbi, həm əlləri "qızıl" olan Nihad Əliyev kimdir?

Əliyev Nihad Fuad oğlu 14 sentyabr 1971-ci il tarixdə Gəncə şəhərində doğulub. Ziyalı ailəsində dünyaya gələn Nihad həkim qədirbilən övlad, güvənilən qardaş, sevimli həyat yoldaşı və qayğıkeş atadır. Onun atası Fuad Əliyev ali kateqoriyalı mühəndisdir, müxtəlif vəzifələrdə çalışıb. O, həmçinin şair-publisistdir, poeziyada Fuad İslamoğlu kimi tanınır. "Təmizlik", "Yaşamalı dünyadır", "Bu səs sənin səsindirmi?" və "Qartal səmada tək uçur" adlı dörd kitab müəllifidir. Anası Nişanə xanım isə riyaziyyat müəlliməsidir. Hazırda hər ikisi təqaüddədir. Qardaşı Firad prokurorluq orqanlarında qulluq keçir, Baş ədliyyə müşaviridir (ədliyyə polkovniki). Bacısı Ziyalə xanım, ixtisasca iqtisadçı olmasına baxmayaraq, hazırda evdar xanımdır.

Sumqayıt şəhərində yaşayan Nihad həkim ailəlidir. Həyat yoldaşı Mina xanım müəllimdir. Övladlarından Fuad şərqşünas, Aydan müəllimə, Nihal isə tələbədir.
Orta təhsilini Sumqayıt şəhərində uğurla başa vuran Nihad Əliyev 1989-cu ildə Azərbaycan Dövlət Tibb Universitetinin stomatologiya fakültəsinə daxil olub. 1994-cü ildə həmin fakültəni müvəffəqiyyətlə başa vurduqdan sonra, elə həmin il Sumqayıt şəhəri 2 nömrəli Stomatoloji poliklinikada həkim-stomatoloq kimi fəaliyyətə başlayıb. 1998-ci ildə səhiyyə nazirinin müvafiq əmri ilə adıçəkilən tibb müəssisəsinə baş həkim vəzifəsinə təyin olunub. 1999-2008-ci illər ərzində Sumqayıt şəhəri 2 nömrəli Stomatoloji poliklinikaya rəhbərlik etməklə bərabər, Sumqayıt şəhərinin baş stomatoloqu olub. 2008-ci ildən isə "AQS" "Medical Center" klinikasının baş həkimi kimi fəaliyyətini davam etdirib. 2007-2010-cu illərdə Amerika Meffert İmplant institutunun Ankara filialında təhsil alıb. Beynəlxalq İmplantoloqlar Cəmiyyətinin və Azərbaycanın "İmplantoloq" ictimai birliyinin üzvüdür. Amerika Meffert İmplant institutunun diplomat üzvüdür. Həm ölkəmizdə, həm də müxtəlif dövlətlərdə (Türkiyə, Rusiya, İngiltərə, Almaniya, Fransa, İspaniya, Hollandiya, Finlandiya, İsveç, Belçika, Portuqaliya və Ukrayna) 100-ə yaxın müvafiq ixsasartırma kurslarında və seminarlarda, eləcə də dünyanın və Avropanın ən nüfuzlu konqres və simpoziumlarında iştirak edib. Səmərəli fəaliyyətinə görə dəfələrlə müxtəlif mükafatlarla təltif olunan Nihad Əliyev Yeni Azərbaycan Partiyasının üzvüdür.

Telegramda izləyin

instagramda izləyin