Hakim dilə gəldi: "Maşallah Əhmədovun da işi bizi qocaltdı"

Bakı Apellyasiya Məhkəməsində dələduzluqda təqsirləndirilən keçmiş futbolçu Maşallah Əhmədovun apellyasiya şikayəti üzrə məhkəmə davam edib.

Sonxeber.az-ın məlumatına görə, hakim Faiq Qasımov prosesin əvvəlində maraqlı cümlə işlədib: "Maşallah Əhmədovun da işi bizi qocaltdı".

"Report"un xəbərinə görə isə prosesdə zərərçəkmiş Yusif Əzizov ona ünvanlanan sualları cavablandırıb. Hakim bildirib ki, istintaqın əvvəllində 105 min manat göstərilsə də, zərərçəkmiş 128 min manat ziyana düşdüyünü deyib.

Y.Əzizov çıxış edərək İrandan daş gətirən zaman əlavə də xərclər etdiyini söyləyib. Bu zaman M.Əhmədov əsəbləşib: "Yalan danışırsan! Qırmızı adamsan, düzünü danış".

Hakim M.Əhmədova xəbərdarlıq edib: "Bir də belə hal baş versə, məhkəməni sənsiz davam etdirəcəyik". Məhkəmənin növbəti prosesi aprelin 18-nə təyin edilib.

Qeyd edək ki, Bakı Ağır Cinayətlər Məhkəməsinin hökmü ilə M. Əhmədov 8 il müddətinə azadlıqdan məhrum edilib.

M. Əhmədov 2015-ci il dekabrın 14-də Binəqədi rayon Polis İdarəsinin əməkdaşları tərəfindən saxlanılıb. İlkin məlumata görə, bizneslə məşğul olan "Neftçi"nin keçmiş futbolçusu bir neçə nəfərə 150 min manatdan artıq vəsaitə xaricdən daş plitə gətirəcəyini vəd edib. Lakin o, sözünə əməl etməyib və həmin şəxslərin pulunu qaytarmayıb. Binəqədi rayon Məhkəməsi M. Əhmədov barəsində ev dustaqlığı ilə bağlı qərar çıxarsa da, Bakı Ağır Cinayətlər Məhkəməsi onun 8 il azadlıqdan məhrum edilməsi barədə hökm çıxarıb.

Telegramda izləyin

instagramda izləyin