"Məgər biz məktəb şagirdi, tələbəyik?-Deputatdan SƏRT SÖZLƏR

"Azərbaycan Respublikası Milli Məclisi deputatının etik davranış qaydaları haqqında" yeni qanun layihəsinin qəbulu doğru yanaşma deyil.
Bu sözləri Sonxeber.az-a açıqlamasında millət vəkili Fazil Mustafa deyib.

Onun sözlərinə görə, konstitutsiyada "Deputatın etik davranışı haqqında qanun" qəbul olunub.İlk deputat növbədə etik davranışını bilməlidir. Bu qiymət ona seçici tərəfindən verilməlidir, Seçici onun davranışını qəbul etmirsə, deputata qarşı hər-hansı şəkildə müəyyən cəzalandırma addımları atıla bilər. Lakin etik çərçivənin dəqiq müyyən olunmasına ehtiyac var. Çünki elə deputat var ki emosional çıxış və çağırışlarla seçicinin rəğbətini qazana bilir. Bəzi millət vəkili isə ümumiyyətlə danışmır. Ona görə elə qayda qoyulmalıdır ki, deputatın ikitrəfli ifadə azadlığına xələl gəlməsin. Millət vəkili cəmiyyətə qarşı ədəbsiz hərəkət edibsə, bunun müəyyən cəzalandırma mexanizmi mövcuddur. Bötövlükdə deputatın məmur kimi çərçivəyə salınması doğru yanaşma olmaz.

F.Mustafa millət vəkilinə hədiyyə alma qadağası kimi şərtin qoyulmasına da münasibət bildirib:

"Millət vəkilinə müəyyən bir fəaliyyətinə görə, mükafat verilə bilər. Hər-hansı ölkənin tanıtımı ilə bağlı simvolik hədiyyə təqdim oluna bilər. Ona görə də bu qadağanın hansı məqsədlə qoyulması dəqiqləşdirilməlidir. Gördüyü işin müqabilində deputatın hədiyyə alması qanuna uyğun müddəalarla müəyyən edilməlidir. Mükafatlandırma ilə bağlı ictimai quruluşlar, dövlət qurumları tərəfindən hər-hansı hədiyyənin verilməsinə fərqli yanaşmaq lazımdır.

Millət vəkili Vahid Əhmədov isə Sonxeber.az-a açıqlamasında Milli Məclis deputatının statusu olduğunu deyib.

Onun sözlərinə görə. deputatın statusuna uyğun konsitutsiyada yazılıb və ona uyğun hərəkət etmək lazımdır.

"Milli Məclisin deputatı məktəb şagirdi, universitet tələbəsi deyil axı?! Deputat kifayət qədər yetişmiş siyasətdə olan və insanlarla işləyən şəxsdir. Mən belə hesab edirəm ki, bu cür cılız qanunların qəbul olunmasına ehtiyac yoxdur".

Qeyd edək ki, "Azərbaycan Respublikası Milli Məclisi deputatının etik davranış qaydaları haqqında" yeni qanun layihəsinin məzmunu açıqlanıb.
13 maddədən ibarət olan yeni qanun layihəsinə görə, deputat qarşısında mədəni davranış, Milli Məclisin iclaslarında etik davranma, insanların hüquqlarına, işgüzar nüfuzuna hörmət, qərəzsizlik, qanunsuz maddi və qeyri-maddi nemətlərdən, imtiyazlar və güzəştlərdən imtina, hədiyyə alma qadağası şərt kimi qoyulur. Layihə parlament tərəfindən hazırlanıb, sabah Milli Məclisin İnsan hüquqları komitəsi ilə Hüquq siyasəti və Dövlət quruculuğu Komitəsinin sabah keçiriləcək birgə iclasında müzakirə olunacaq.

Aysel Kərimova

Telegramda izləyin

instagramda izləyin