Azərbaycanlı jurnalistlər Təbrizdə mühüm şəxslərlə görüşlər keçirib - FOTOLAR
Təbriz bələdiyyəsinin təşkilatçılığı ilə Azərbaycan jurnalistləri Təbrizdə 4 günlük səfərdə olub.
Sonxeber.az bildirir ki, jurnalistlər səfərin birinci günü Təbrizin müvəqqəti bələdiyyə sədri Məhəmmədhüseyn İshaqi ilə görüşüblər. Bələdiyyə sədri iki ölkə arasındakı münasibətlərdən də danışıb: "Biz Azərbaycanla əməkdaşlığa mühüm yer veririk. Bakı çox müasir, inkişaf edən şəhərdir. Arzumuz budur ki, ikitərəfli əlaqələrimiz daha da inkişaf etsin".
O qeyd edib ki, səfərdə məqsəd gələn il Təbrizin "İslam turizm paytaxtı" seçilməsi ilə əlaqədar iki ölkə arasında turizm sahəsində əlaqələri daha da genişləndirməkdir.
M. İshaqi azərbaycanlı jurnalistlərin səfərindən məmnun olduğunu deyib. O, Təbrizin tarixi, görməli yerləri barədə görüş iştirakçılarına məlumat verib. M. İshaqi deyib ki, 2018-ci ildə Təbrizin islam ölkələrinin paytaxtı seçilməsi şəhərin əhəmiyyətini göstərir.
Növbəti gün İranda səfərdə olan azərbaycanlı jurnalistlər Təbrizin icra başçısı Rəhim Şöhrətifər görüşüblər.
R. Şöhrətifər qeyd edib ki, hər iki dövlətin tarixi bağlılığı var. O, Təbrizin 2018-ci ildə "İslam ölkələrinin turizm paytaxtı" elan olunduğunu xatırladaraq 2019-cu ildə bu adın Bakıya veriləcəyini söyləyib: "Bu, təsadüfi deyil. Çünki bizim tariximizin, mədəniyyətimizin və əhalimizin qonaqpərvərliyi hər iki şəhərə bu adın verilməsinə imkan verib".
R. Şöhrətifər deyib ki, İrandan Azərbaycana çoxlu sayda turist səfər edir: "Biz çalışmalıyıq ki, bu ittifaqı genişləndirək və Azərbaycandan da İrana gələn çox olsun. Biz istəyirik ki, Azərbaycan hökuməti İrandan gələnlərdən viza almasın, bununla da Təbrizdən Azərbaycana çoxlu sayda turist getsin. Təbriz tarixi cəhətdən İranın ən böyük şəhəridir. Təbrizin tarixi və görməli yerləri çoxdur. Jurnalistlər də çalışmalıdır ki, bu yerlərlə tanış olub, bunları Azərbaycan ictimaiyyətinə, azərbaycanlı turistlərə çatdırsınlar".
Təbriz şəhər parlamentinin sədri Şakur Əkbər Nicat çıxış edib. O, iki ölkə vətəndaşlarının eyni tarixi kökə malik olduğunu söyləyib.
Növbəti gün İranda səfərdə olan azərbaycanlı jurnalistlər İran İslam Respublikasının Təbriz şəhərindəki Baş konsulluğunda olublar.
"İran vətəndaşları Azərbaycana getmək üçün vizanı artıq 3 saata əldə edə bilirlər" - Azərbaycanın İran İslam Respublikasının Təbriz şəhərindəki Baş konsulluğundan məlumat verilib.
Bildirilib ki, əcnəbilər üçün "ASAN Viza" sisteminin tətbiqi dünyanın müxtəlif ölkələrindən Azərbaycana gəlmək istəyən turistlər üçün əlverişli şərait yaradıb: "Bu, həmçinin İrandan Azərbaycana gələn turistlərin sayına da müsbət təsir edib. Təsadüfi deyil ki, avqust ayında Azərbaycana gəlmək üçün təxminən 6000 İran vətəndaşı müraciət edib. Bu o deməkdir ki, son aylarda İran İslam Respublikasından Azərbaycana gələn turistlərin sayı 87% artıb".
Səfərdə olan azərbaycanlı jurnalistlər Təbrizin İmam cüməsi Seyid Məhəmməd Əli Haşimi ilə görüşüblər.
Təbrizin İmam cüməsi Azərbaycanla İranın heç bir zaman bir-birlərindən ayrılmayacağını bildirib: "Bu iki dövlət hər zaman bir-birləri ilə yaxşı münasibətdə olub, inşallah bundan sonra da olarlar. Azərbaycanın mərhum prezidenti Heydәr Əliyev bu evdә Ayәtullah Mәlakuti ilә görüşüb. Azәrbaycanın bizim qәlbimizdә yeri hәr zaman yüksәkdir. Düşmənlər çox çalışırlar ki, sizi bizdən ayırsınlar. Gərək çox diqqətli, iradəli olaq ki, düşmənlərin cəhdləri baş tutmasın".
Növbəti gün jurnalistlər "Mədəni irs, Turizm və Əl İşləri Sənayesi üzrə Mərkəz"də olublar. Azərbaycandan gələn qonaqları qurumun rəhbəri Mürtəza Abdar və əməkdaşları qarşılayıb. Azərbaycanlı jurnalistlərə mərkəz barədə məlumat verən qurumun rəhbəri Təbrizin 2018-ci il üçün İslam paytaxtı seçildiyini xatırladıb və bununla əlaqədar şəhərdə bir neçə beyin mərkəzinin yaradıldığını bildirib. Onun sözlərinə görə, ideyası olan hər kəs Mərkəzə gələrək öz fikirlərini bəyan edir: "Bunu kimliyindən, vəzifəsindən asılı olmayaraq hər kəs edə bilər. Bundan sonra toplantı keçirilir və təkliflər müzakirəyə çıxarılır".
Bir daha xatırladaq ki, jurnalistlərin Təbriz səfəri səfər avqustun 30-dan sentyabrın 2-dək davam edib.
Mirvari Nəcəf
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş