Dünyanın ən güclü insanları Azərbaycan polisləri imiş - FOTO

Moskvada pauerliftinq üzrə növbəti dünya çempionatı keçirilib. Yarışda bu idman növündə də favorit hesab olunan Azərbaycan millisi növbəti uğurunu qazanıb.

Daxili İşlər Nazirliyindən (DİN) verilən məlumata görə, dünyanın ən güclü atletlərinin yarışında millimizin heyətində təmsil olunaraq qələbə uğrunda mübarizə aparan polis idmançılarından Samux RPŞ-nin inspektoru, polis kapitanı Rüfət Ağayev yarışın proqramına daxil olan çiyində ştanqla oturub qalxma hərəkətində 470 kq, ştanqı qurşağadək dartmaqda 340 kq, ştanqı sinədən qaldırma hərəkətində isə 280 kq-nın öhdəsindən gəlməklə çəkisi 125 kq-dək olan, xüsusi təchizatla yarışan atletlər arasında ümumilikdə 1090 kq nəticə ilə qızıl medal qazanıb. R.Ağayev bununla səkkizinci dəfə dünya çempionu adına sahib olub.

Səbail Rayon Mühafizə İdarəsinin polis nəfəri, polis baş serjantı Razim Hüseynov çəkisi 125 kq-dək təchizatsız yarışan idmançıların sırasında çiyində ştanqla oturub qalxma hərəkətində 345 kq, ştanqı qurşağadək dartmaqda 330 kq, ştanqı sinədən qaldırma hərəkətində isə 250 kq-ın öhdəsindən gəlməklə ümumilikdə 925 kq nəticə ilə millimizin medal mücrüsünə daha bir qızıl medal əlavə edərək dünya çempionu adını qazanıb.

İsmayıllı RPŞ-nin polis nəfəri, polis baş serjantı Kamil Qafarov çempionatda "bench press" - ştanqı sinədən qaldırma hərəkətində gücünü sınayıb. Çəkisi 90 kq-dək olan idmançıların mübarizəsində o, 240 kq nəticə ilə bütün rəqiblərini geridə qoyaraq altıncı dəfə dünya çempionu adını qazanıb.

"Azərbaycan Televiziya və Radio Verilişləri" QSC-nin mühafizə şöbəsinin əməkdaşı, polis serjantı Roman Əhmədov isə "deadlift"- ştanqı qurşağadək dartma hərəkətində yarışıb. O, çəkisi 82 kq-dək olan idmançılar arasında 225 kq-ı qaldırmaqla ikinci yeri tutub.

Telegramda izləyin

instagramda izləyin