Rusiyada azərbaycanlı müdiri olan həmyerlisini öldürüb xəstəxanaya atıb qaçdı - YENİLƏNİB - VİDEO

Moskva vilayətində Azərbaycan vətəndaşını öz həmyerlisini qətlə yetirdiyi məlum olub.

Sonxeber.az APA-ya istinadən xəbər verir ki, noyabrın 13-də Moskva vilayətinin Naro-Fominsk rayonunda Azərbaycan vətəndaşı, 1981-ci il təvəllüdlü Xanbaba Nərimanovu qətlə yetirən şəxs Azərbaycan vətəndaşı, 1987-ci il təvəllüdlü Fariz Hüseynov olub.

MDB ölkələri üzrə Mütəşəkkil Cinayətkarlığa Qarşı Mübarizə Bürosunun direktor müavini, polis general-mayoru Əkbər Yusifov APA-ya həmyerlilərimiz arasında baş verən qətl hadisəsinin təfərrüatları barədə danışıb: "Qətlə yetirilən Xanbaba Nərimanov biznes fəaliyyəti ilə məşğul olub. O, Rusiyanın Kaluqa vilayətində qeydiyyatda olub. Qətldə şübhəli bilinən Azərbaycan vətəndaşı Fariz Hüseynov Xanbaba Nərimanovun işçisi olub. Aralarında mübahisə yaranıb. Fariz Xanbabaya bıçaqla xəsarət yetirib. Sonra onun cəsədini avtomobilinə qoyaraq Naro-Fominsk rayonundakı xəstəxananın qarşısına gətirib və oradan qaçıb. Fariz hələ də saxlanılmayıb".

Ə.Yusifov bildirib ki, faktla bağlı cinayət işi açılıb, F. Hüseynovun saxlanılması istiqamətində əməliyyat-axtarış tədbirləri keçirilir.

***

Rusiyada Azərbaycan vətəndaşının meyitini "Porsche" markalı avtomobildə gəzdirən şəxs axtarılır.

Sonxeber.az baku.ws-yə istinadən xəbər verir ki, bu barədə hüquq-mühafizə orqanlarından lenta.ru saytına məlumat verilib.

Bildirilir ki, hadisə Moskva ətrafında baş verib.

Hüquq-mühafizə orqanlarındakı mənbənin sözlərinə görə, Novikova küçəsində yerləşən xəstəxanalardan birinin həyətinə yük yerinin qapısı açıq olan "Porsche" markalı avtomobil daxil olub.

Sürücü dərhal maşından düşərək qaçıb. Daha sonra maşının sərnişinlər üçün nəzərdə tutulmuş oturacağında qanlar içində olan meyit aşkarlanıb.

Hadisə yerinə gələn həkimlər onun öldüyünü bildiriblər.

Hüquq-mühafizə orqanlarının əməkdaşları müəyyən ediblər ki, öldürülən şəxs Azərbaycan vətəndaşıdır.

Hazırda həmin avtomobildən qaçan şəxsin tapılması istiqamətində bütün ölkədə axtarışlar aparılır.

Telegramda izləyin

instagramda izləyin