Artur Rasi-zadənin gedəcəyi proqnoz edilirdi, Novruz Məmmədovun təyinatı sürpriz oldu - AÇIQLAMA

Xəbər verdiyimiz kimi bu gün Azərbaycana yeni Baş nazir təyin olundu. Bir çox adlar sadalansa da heç kimi gözləmədiyi təyinat oldu. Belə ki, Azərbaycan Respublikası Prezidentinin xarici siyasət məsələləri üzrə köməkçisi - şöbə müdiri Novruz Məmmədov yeni Baş nazir təyin edildi.

Bununla bağlı BiG.AZ-a açıqlama verən Neft Araşdırmaları Mərkəzinin rəhbəri İlham Şaban qeyd edib ki, Artur Rasi-zadənin vəzifəsindən gedəcəyi bir xeyli əvvəl proqnoz edilirdi, ancaq Novruz Məmmədovun təyinatı əsl sürpriz oldu: "Onu deyim ki, bir müddət əvvəl mən hətta bir sıra millət vəkilləri ilə yeni baş nazir vəzifəsinə mümkün namizədlərlə bağlı danışmışdım, cəmi birinin proqnozu özünü doğrultdu. Yəni bu təyinat çoxları üçün gözlənilməz oldu. O ki, qaldı Novruz müəllim Baş nazir kimi özünü bu vəzifədə necə göstərəcək, bunun üçün necə deyərlər ən azından müəyyən zamana ehtiyac var. Əvvəla onun komandası formalaşmalıdır. Prezidentin dünən imzaladığı sənədlərdən göründüyü kimi bir Nazirlər Kabinetinin strukturunda islahatlar aparılır və onların başa çatması üçün bir ay vaxt lazım olacaq. Bəzi qurumlara rəhbər təyin edilməsi ola bilsin məhz o struktur dəyişiklikləri hüquqi baxımdan sona yetdikdən sonra baş versin. Ona görə də yeni Baş nazir komandası ilə fəaliyyətə tam tərkibdə və yeni proqramla hesab edirəm ki, mayın sonundan start verə bilər. O ki, qaldı ki , yeni Baş nazirin iqtisadçı olmaması məsələsinə bu o qədər də önəmli deyil. Çünki Baş nazir qərar verən şəxsdir. Əsas məsələ düzgün qərarın çıxarılması üçün savadlı məsləhətçilərə malik olmaqdır".

Telegramda izləyin

instagramda izləyin