"Laçın" Ticarət Mərkəzində baş verən qızıl çəkişməsi-MƏHKƏMƏDƏ

Bu gün Bakı Ağır Cinayətlər Məhkəməsində dələduzluqda təqsirləndirilən Minarə Fərzəliyevanın cinayət işi üzrə məhkəmə prosesi davam etdirilib.

Sonxeber.az-ın məlumatına görə, hakim Novruz Kərimovun sədrliyi ilə keçirilən prosesdə prokuror ittiham aktını elan edib.

M. Fərzəliyeva elan olunmuş ittihamla özünü qismən təqsirli bilib. O, deyib ki, qızıl dükanın sahibi Zümrüd Göyüşovaya 132 min manat deyil, 34 min manat məbləğində borcu qalıb: "Bunun əvəzində 700 qram qızıl vermişəm, Zümrüd Göyüşova qəbul etməyib, qızılları yerə çırpıb və deyib ki, mənə qızıl yox, 134 min manat məbləğində nəğd pul verməlisən. Zümrüd haqsız yerə polisə şikayət edib. Əgər araşdırsaz görərsiz ki, bu, Zümrüdün birinci işi deyil. Neçə şəxsi əsassız yerə polisə verib həbs etdirib".

Sonra şahid qismində Şəfəq Məmmədova ifadə verib. O bildirib ki, 2012-ci ildən zərərçəkmiş Zümrüd Göyüşovun işçisi olub: "Həmin illər ərəfəsində Minarə Fərzəliyeva qızıl alış-verişi edirdi. Bundan istifadə edərək, Zümrüd Göyüşova deyib ki, guya Minarə Fərzəliyeva son 1 il ərzində qızılları götürüb, pulunu verməyib. Və hazırda 134 min manat borcu var. Halbuki, mən Zümrüdün satıcısı olaraq bildirirəm ki, bu, tamamilə yalan ifadədir. Çünki pulları mən qəbul edirdim və bu barədə qeydiyyat dəftərinə imza atırdım. Minarənin ittihamda göstərilən kimk deyil, 34 min manat məbləğində borcu qalıb. Bu da ki, son 2-3 ay ərzində ləngimələrinə görə, bu borc yığılıb. Buna səbəb Minarənin işinin zəifləməsi olub. Şəxsən mən, Zümrüdün işçisi olan müddətdə, Zümrüd mənim adıma bankdan 10 min ABŞ dolları məbləğində götürüb, ödəməyib. Hazırda bu borc mənim üzərimdədir və iş məhkəmədədir".

Prosesdə zərərçəkmiş Zümrüd Göyüşova da ifadə verib. O, vəkilin suallarını cavablandırıb. Z. Göyüşova deyib ki, M. Fərzəliyevaya etibar etdiyi üçün qızılları verib.

Zərərçəkmiş yüksək səslə danışdığı üçün, hakim ona xəbərdarlıq edib.

M. Fərzəliyeva isə qızılları qaytardığını, Zümrüd Göyüşovanın onları qəsdən lom etdiyini deyib.

Prosesdə şahid qismində M. Fərzəliyevanın anası Tamila Fərzəliyeva da ifadə verib. O bildirib ki, Zümrüd Göyüşovaya deyilən məbləğdə bordu yoxdur: "Zümrüdü evimə çağırdım, ona 800 qram qızıl verdim. Amma o, yerə atdı, bunu qəbul etmədi".

Proses mayın 1-də davam etdiriləcək.

İttihama görə, M. Fərzəliyeva qızıl ticarəti adı ilə Zümrüd Göyüşovaya məxsus "Laçın" Ticarət Mərkəzində qızıl dükanından qızıl alıb və geri qaytarmayıb.

Telegramda izləyin

instagramda izləyin