Banklarımızda daha bir problem - ekspert bunun səbəblərini və çıxış yollarını GÖSTƏRDİ

"Bütövlükdə son illər Azərbaycanda banklarda hesabların açılması prosedurları xeyli sadələşdirilib. Bununla belə, banklarda hesabların açılması lə bağlı bir sıra problemlər var".

Bunu Sonxeber.az-a iqtisadi ekspert Vüqar Bayramov "Banklarda hesabların açılması, aparılması və bağlanması Qaydası"na dəyişikliklərin edilməsi ilə bağlı məsələyə münasibət bildirərkən deyib.

Onun sözlərinə görə, nə qədər qəribə olsa da, banklarda hesab açmaq istəyən şəxsdən Avropada, xüsusilə ABŞ-da hesabının olub-olmaması soruşulur: "Halbuki inkişaf etmiş ölkələrdə hesabların olması bizim banklarda heabların açılmasına mane olmamalıdır".

Ekspert xatırladıb ki, eyni zamanda banklarda hesablar açılarkən fiziki şəxslərin hesabları və cari hesablar fərqli metodlarla açılır. V. Bayramov diqqətə çatdırıb ki, bununla belə, cari hesabların açılması ciddi zaman tələb etmir: "Sadəcə olaraq cari hesabların açılması zamanı bir sıra banklarda müəyyən problemlər olur. Bu da ondan ibarətdir ki, hesablar açılarkən depozitlər, xüsusən plastik kartlarda depozitlər tələb olunur. Bu baxımdan depozitlərin ləğv olunmasına ehtiyac var. Cari hesab açılarkən və ya plastik kart alınarkən sığorta depozitinin tələb olunmasının tamamilə aradan qaldırılmasına ehtiyac var".

O vurğulayıb ki, eyni zamanda, fiziki şəxslərin, yəni biznes hesabları açılanda çətinlik zamanla bağlıdır: "Nəzərə alsaq ki, bu, vergi hesabıdır, bu cür hesabların açılması müəyyən zaman tələb edir. Elektron müraciət olsa belə, bu, bir neçə gün vaxt aparır. Proseduraların azaldılması daha məqsədəuyğundur, elektron müraciət halında isə hesab bir gündən gec olmayaraq açılmalıdır".

V. Bayramov əlavə edib ki, hesabların açılması sadələşdirilməli və bu zaman daha az prosedurlar həyata keçirilməlidir: "Bu da nəticə etibarı ilə banklarda hesabların artmasına və banklar üzrə hesablaşmaların həcminin çoxalmasına gətirib çıxara bilər".

Məftun Salmanov

Telegramda izləyin

instagramda izləyin