Devalvasiya, Beynəlxalq Bankdakı cinayətlər, dövlət zəmanəti - MİLLİ MƏCLİSDƏ MÜZAKİRƏ

"2018-ci il dövlət büdcəsinə dəyişikliklər edilməsi haqqında" qanun layihəsində qeyri-neft sektoru üzrə gəlirlərin 1 milyard manatdan artıq məbləğdə azaldılması sual doğurur. Biz qeyri-neft sektorunun inkişaf etdirilməsi üçün küllü miqdarda vəsait ayırırıq, lakin büdcədə bu sahə üzrə gəlirlərin azaldılması nəzərdə tutulur".

Sonxeber.az Apa tv – yə istinadan xəbər verir ki, bu fikirləri Milli Məclisin İqtisadi siyasət, sənaye və sahibkarlıq komitəsinin iclasında millət vəkili Vahid Əhmədov səsləndirib.
Millət vəkilinin sözlərinə görə, bu məsələ diqqət mərkəzində saxlanılmalıdır: "Bundan başqa, büdcədə xərclərin artırılması da nəzərdə tutulur. Bunlar əsasən pensiya, əmək haqları, sosial müavinətlərin yerinə yetirilməsi ilə bağlıdır. Eyni zamanda, büdcədə Dövlət Neft Şirkətinə qazma işləri ilə bağlı 663 milyon manat vəsaitin ayrılması nəzərdə tutulub. Mən bir məsələni başa düşə bilmirəm. Necə olur ki, Azərbaycan özü qaz hasil edir, lakin "Azərenerji"yə kompensasiya veririk? Düşünürəm ki, qeyri-neft sektorunun inkişafı daha diqqətdə saxlanmalı məsələdir. Məni narahat edən digər məsələ 2-ci Azərbaycan Kənd İnvestisiya Layihəsinin dayandırılması ilə bağlıdır. Dünya Bankı ilə birgə həyata keçirilən layihə üzrə biz rayonlarda, kənd yerlərində təcili ehtiyac yaranan zaman investisiyadan istifadə edirdik. İndi bu layihə dayandırılıb. Kənd yerlərindən bizə müraciət çox olur. Mən kənd təsərrüfatı naziri İnam Kərimovla danışmışam. Lazımdırsa, prezident İlham Əliyevə də müraciət edilməsini xahiş edirəm".
Millət vəkili Əli Məsimli də "2018-ci il dövlət büdcəsinə dəyişikliklər edilməsi haqqında" qanun layihəsi ilə bağlı öz iradlarını bildirib.
"Tikintiyə ayrılan vəsait 5 milyard manatdan çoxdur" deyən Əli Məsimli qeyd edib ki, insan inkişafına, təhsilə ayrılan xərclər isə azdır: "Dövlət büdcəsindən SOCAR-a edilən yardım heç bir məntiqə sığmır. SOCAR kimi böyük şirkətlər bu cür yardıma arxayınlaşıb, dövlət zəmanəti ilə kredit alıb qaytarmayacaqlar. Bu, Azərbaycanın dövlət büdcəsini donor büdcəyə çevirmək deməkdir".
Maliyyə naziri Samir Şərifov millət vəkillərinin iradına münasibət bildirib: "Burada 2-ci Azərbaycan Kənd İnvestisiya Layihəsinin bağlanmasından söhbət getmir. Bu layihə regionlarda müəyyən işlərin görülməsi ilə bağlıdır. Layihənin dayandırılması yox, davam etdirilməsi nəzərdə tutulub. Lakin əvvəlki illərdə biz bu layihəni xarici borclanma hesabına edirdik. Bundan sonra layihəni daxili maliyyə imkanları hesabına həyata keçirəcəyik. Xarici borclanmaya getməməyin əsas səbəbi ondan ibarətdir ki, biz xarici valyuta ilə bağlı məsələlərə həssas yanaşırıq. Xarici valyutada gəlirlərimizi artırmağa çalışırıq, bunun hesabına ölkədən valyuta axınının qarşısını almalıyıq".
Maliyyə naziri xarici borcun artmasının 3 əsas səbəbini açıqlayıb: "Azərbaycanın xarici borcunun artmasının üç əsas səbəbi var. Bunlar devalvasiya ilə bağlı xarici borcun ÜDM-ə nisbətin artması, maliyyə-bank sisteminin sağlamlaşdırılması üçün görülən tədbirlər və "Cənub Qaz Dəhlizi" layihəsi ilə bağlı verilən dövlət zəmanətidir".
Nazir bu ilin dövlət büdcəsinə yenidən baxılmasını zəruri edən amilləri açıqlayıb.
Qeyd edib ki, yenidən baxılma ilə bu ilin dövlət büdcəsində xərclərin 2 milyard 14 milyon manat artırılaraq 23 milyard 61 milyon manata çatdırılması nəzərdə tutulur ki, bu da təsdiq edilmiş proqnoza nisbətən 3,6 faiz, 2017-ci ilin faktiki icra göstəricisi ilə müqayisədə 31,1 faiz çoxdur.

Telegramda izləyin

instagramda izləyin