"Rövşənə de, məni rahat buraxsın..." - Arvadını uşaqlarının gözü qarşısında öldürən ər - TƏFƏRRÜAT

Bakıda arvadını uşaqlarının gözü qarşısında öldürməkdə təqsirli bilinən Rövşən Dadaşovun cinayət işi üzrə ibtidai istintaq başa çatıb.

İş materialı baxılması üçün Bakı Ağır Cinayətlər Məhkəməsində hakim Səbuhi Hüseynovun icraatına verilib.

Məkəmənin hazırlıq iclası iyulun 30-na təyin olunub.

İttihama görə, bu il yanvarın 10-da saat 23.55-də Nəsimi rayonu, Cavadxan küçəsindəki evdə yerləşən kirayə mənzillərin birində 31 yaşlı Aidə Dadaşova başına küt alətlə vurulan zərbə nəticəsində ölüb.

Məlum olub ki, Aidə Dadaşovanı əri, 38 yaşlı Rövşən Dadaşov törədib. O, həbs edilib.

Rövşən Dadaşovun arvadını qətlə yetirməsinə qısqanclıq səbəb olub. Dindirilmə zamanı Rövşən Dadaşov deyib ki, o, beş gün sərasər arvadının hərəkətlərini izləyib.

Ailə dağılmaq ərəfəsində olub. Hadisədən bir müddət əvvəl Aidə Dadaşova votsap mobil tətbiqi vasitəsilə baldızına yazıb: "Rövşənə de, məni rahat buraxsın, biz boşanırıq".

Cütlük arasında qalmaqallar adi hal olub. Kişi həmişə arvadını döyürmüş. Bu səbəbdən qadın ərinin yanından gedib. Bir müddət o, məişət zorakılığına məruz qalanlar üçün sığınacaqda yaşayıb.

Amma Rövşən Dadaşov uzun danışıqlardan və bir daha arvadını döyməyəcəyinə söz verəndən sonra qadını evinə qaytara bilib.

İki uşağı olan cütlük Cavadxan küçəsində mənzil kirayələyib və qadın ərinə boşanmaq qərarına gəldiyini deyənə qədər bir müddət bir yerdə yaşayıb.

Hadisədən beş gün qabaq Rövşən Dadaşov evdən gedib. Lakin yanvarın 10-da gecə kirayə qaldıqları mənzilə qayıdıb və qadından onu evə buraxmağı xahiş edib. O, evə öz əşyalarını götürmək üçün qayıtdığını deyib. Qadın onu evə buraxıb.

Bu zaman növbəti qalmaqal başlayıb. Onlar bir-birini qarşılıqlı ittiham edib və bu ittihamlar onları özlərindən çıxarıb. Analarına görə qorxduqları üçün uşaqlar evdəki bütün bıçaqları götürərək blokda gizlədiblər.

Amma həmin vaxt kişi hazırlıqlı gəlibmiş. O, özü ilə dəmir parçası gətirib və onunla qadını uşaqlarının gözü qabağında öldürüb.

Aidə Dadaşovanın rəfiqəsi istintaqa verdiyi ifadədə bildirib ki, kişi heç yerdə işləməyib və həmişə qadına güc tətbiq edib. O, daim qadını evdən qovurmuş ki, gedib pul qazansın. Özü də hər gün evdə nahara ət yeməyi tələb edirmiş.

İstintaq orqanı tərəfindən Rövşən Dadaşovin barəsində Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham elan edilib. (teleqraf)

Telegramda izləyin

instagramda izləyin