Rusiya Azərbaycanın şərtlərini qəbul edib - Eskpertən AÇIQLAMA

Xəbər verdiyimiz kimi, ötən gün Lavrovla Mirzoyanın görüşündə əsas diqqətçəkən məqamlardan biri də birgə mətbuat konfransında Rusiya XİN başçısının erməni diversantlarla bağlı açıqlaması və Ermənistan XİN rəhbərinin dəfələrlə Qarabağın "status"u məsələsini qaldırmasına baxmayaraq, Lavrovun bir dəfə də olsun "status" məsələsinə toxunmaması idi.

Məsələ ilə bağlı Sonxeber.az saytına açıqlama verən hərbi ekspert Şair Ramaldanovun sözlərinə görə, Ermənistan Azərbaycan və Rusiya arasında getdikcə dərinləşən dostluq və əməkdaşlıq əlaqələrinə xələl gətirməyə çalışır:

"Rusiya Azərbaycanla əlaqələrinin yaxşı olmasında hər zaman maraqlı tərəf olub. Qarşılıqlı olaraq, Azərbaycanın da Rusiya ilə strateji partnyorluq şəklində sıx əlaqələri mövcuddur. Əgər biz Ermənistanda Rusiyanın bazasının olmasını nəzərə almasaq, Rusiyanın Azərbaycanla əlaqələri bütün təbəqələrdə Ermənistanla olan əlaqələrdən daha sıxdır. Çünki Azərbaycanın açıq-aydın siyasəti var və bu siyasət qonşuluğa, dostluğa və bütün ölkələrlə normal münasibətlərə yönəlmiş bir siyasətdir. Həmçinin, Azərbaycan elə bir dövlətdir ki, istər Qərb, istərsə də Şərq dövlətləri Azərbaycanla çox yaxşı münasibət qurublar. Biz heç kimdən asılı bir dövlət deyilik. Ona görə də Rusiya üçün Azərbaycanın önəmi böyükdür. Cənab Prezident İlham Əliyevin Rusiya Federasiyasının Prezidenti Vladimir Putinlə sıx və isti, hətta dostluq münasibətləri mövcuddur. Azərbaycan bu dostluğu müsbət dəyərləndirir. Digər tərəfdən, deyərdim ki, Azərbaycan dövləti "dilənçi" bir dövlət deyil, özü öz ayaqlarının üstündə duran, iqtisadiyyatını gücləndirə, inkişaf etdirə bilən, öz enerji resursları ilə zəngin olan bir dövlətdir. Bu gün Azərbaycan Silahlı Qüvvələrinin potensialı 50 ən güclü dövlətlər sırasındadır. Zənnimcə, yaxın günlərdə biz bunu yenidən təsdiq edəcəyik.

Azərbaycan monodilli dövlət deyil. Burada bütün millətlər, o cümlədən rusdilli xalqlar da yaşayır. Bu gün postsovet məkanında rus dilli məktəblər ən çox Azərbaycanda yerləşir. Burada rus sektorunda oxuyan əhalinin nümayəndələri çoxdur. Buna görə də Rusiya üçün Azərbaycanla əlaqələr çox mühümdür. Azərbaycan öz dürüst siyasəti və düzgün mövqeyi ilə Cənubi Qafqazda stabilliyi təmin edəcək ölkələrdən biridir. Bu gün dövlətimizin Türkiyə ilə sıx dostluq və qardaşlıq əlaqələri mövcuddur. Qardaş Türkiyənin Rusiya ilə münasibətləri müəyyən bir şəkildə Azərbaycanın prizmasından keçir. Yəni burada Azərbaycan faktoru çox güclüdür.

Sadəcə Rusiyanın Ermənistanla müttəfiq olması onların Azərbaycanla olan birlik qurma istəyini müəyyən mənada ləngidir. Üçtərəfli bəyənata qol çəkilməsi məsələsinin əsas təşəbbüskarı Rusiya prezidenti, cənab Vladimir Putin olub. Onun Ermənistana olan təsiri nəticəsində 3 rayon məsələsi də həll edilib. Nəzərə alaq ki, burada əsas faktor Azərbaycan ordusunun qələbəsidir.

Bu gün Rusiyanın Azərbaycanda müvəqqəti yerləşdirilmiş sülhməramlı qüvvələri sülhün bərqərar edilməsində və gələcəkdə imzalana biləcək sülh müqaviləsinin bağlanması üçün vasitəçilik edir. Bunlar Rusiyanın Azərbaycana olan səmimi münasibətlərinin təcəssümüdür. Təəssüflər olsun ki, Ermənistan Azərbaycan və Rusiya arasında getdikcə dərinləşən dostluq və əməkdaşlıq əlaqələrinə xələl gətirməyə çalışır. Buna görə də sərhəddə atəşkəsi pozurlar. Çünki bilirlər ki, Ermənistan sərhədinə prinsip cəhətdən cavabdehliyi Rusiya daşıyır. Həm də Ermənistan tərəfi Rusiya sülhməramlı qüvvələrinin yerləşdiyi ərazilərdə Azərbaycana qarşı atəşkəsi pozmaqla Rusiya ilə aramızdakı əlaqələri gərginləşdirməyə çalışır. Bütün bunlara baxmayaraq, cənab Prezident sülhməramlı qüvvələr haqqında öz fikrini söyləyəndə, onların qarşıda duran tapşırıqları yerinə yetirdiklərini də ifadə edib. Zəngəzur məsələsinin də bəyannamədə öz əksini tapması mühüm faktordur və bu, Rusiya və Türkiyənin təşəbbüsüdür. Qısaca, iki dövlət arasındakı əlaqələrin inkişafı həm Rusiya, həm də Azərbaycan üçün böyük maraq kəsb edir. Ona görə də Sergey Lavrov, cənab Prezident İlham Əliyevin status məsələsi ilə bağlı fikrinə əsaslanaraq, bu kəlməni dilinə gətirməyib".

Rafi Müslümov

Telegramda izləyin

instagramda izləyin