Rəsmilərin çıxışından qorxuya qapılmayın! - Devalvasiya olmayacaq - PROQNOZ

Sentyabrın 26-da maliyyə naziri və baş bankir manatın durumu ilə bağlı qısa olsa da maraqlı açıqlamalar verdilər.

Sonxeber.az bildirir ki, iqtisadçı Samir Əliyev bu açıqlamalardan sonra özünün "facebook" səhifəsində gəldiyi qənaəti bölüşüb:

"Birinci, manatın üzən məzənnəyə nəzəri olaraq keçib, məzənnə sərt şəkildə idarə olunur. İkinci, manatın mövcud məzənnəsi real deyil, bazarın öhdəsinə buraxılarsa, daha da aşağı düşər. Üçüncü, hökumət kəskin devalvasiyaya imkan daxilində getməyəcək, ancaq yumşaq devalvasiya davam etdiriləcək. Dördüncü, manatın məzənnəsi tədiyyə balansının vəziyyətinə uyğun tənzimlənəcək. Beşinci, Mərkəzi Bank pul kütləsini artırmaq niyyəti yoxdur. Hətta bu baş versə belə, digər alətlər vasitəsilə (məsələn, depozit hərracı) bazara yol tapmasına imkan verməyəcək. Altıncı, dövlət büdcəsinin xərcləri getdikcə kiçilməkdə davam edəcək. Yeddinci, idxal müxtəlif üsullarla məhdudlaşdırılacaq. Səkkizinci, əhaliyə kreditlər üzrə güzəştlər olmayacaq".

Samir Əliyev nazirlərin söylədiyi fikirlərdə yeniliyin olmadığını və ekspertlərin həmişə bu fikirləri səsləndirdiyini də vurğulayıb:

"Maliyyə kapitanlarının fikirlərində isə ehtiyatlılıq kifayət qədər sezilirdi. Xüsusən də manatın məzənnəsinə münasibətdə. Ancaq Mərkəzi Bankın rəhbərinin "məzənnə ilə bağlı hər hansı proqnoz vermək çətindir" fikrinə rəğmən maliyyə nazirinin manatın möhkəmlənəcəyi ilə bağlı ümidləndirici fikri diqqətdən kənarda qala bilməzdi. Əslində maliyyə naziri də bunun ancaq bir sıra şərtlər daxilində mümkünlüyü qeyd edib. O şərtlər isə hazırda yoxdur. Ona görə də eyforiyaya qapılıb manatın bahalaşacağını gözləməyə dəyməz. Çünki manatın bahalaşmasını şərtləndirən amil yoxdur. Yeganə şərt olan neftin bahalaşması hələ ki, real görünmür. Bütün şərtlər manatın ucuzlaşacağını diqtə edir".

Telegramda izləyin

instagramda izləyin