Dağlıq Qarabağla bağlı Bakıdan SƏRT MESAJ
Ötən ilin aprelində Dağlıq Qarabağ münaqişəsi zonasında baş verən hadisələrdən, konkret olaraq Azərbaycan Ordusunun Ermənistan silah birləşmələrinə qarşı həyata keçirdiyi əks-hücum əməliyyatlarından sonra Azərbaycanın Ermənistan tərəfindən işğal edilmiş ərazilərinin bir hissəsi azad edildi.
Ciddi uğursuzluğa düçar olduğunu görən Ermənistan rəhbərliyi dərhal beynəlxalq vasitəçilərin, daha dəqiq desək, Rusiyanın köməyi ilə döyüş əməliyyatlarının dayandırılmasını və məsələnin danışıqlar yolu ilə həllinə razılıq verdiyini bildirdi.
Lakin gözlənildiyinin əksinə olaraq, danışıqlar yenə də heç bir müsbət nəticə vermədi. Əksinə, ermənilər yaranmış fasilədən istifadə edərək həm Rusiyadan əlavə müasir silahlar və hərbi texnika əldə etdilər, həm də cəbhə xəttində və ordudakı boşluqların doldurulmasına, çatışmazlıqların aradan qaldırılmasına müəyyən qədər nail oldular. Daha sonra bundan ruhlanan Ermənistan rəhbərliyi yenidən boğazdan yuxarı bəyanatlar səsləndirməyə, cəbhə xəttində, o cümlədən Ermənistan-Azərbaycan sərhədində təxribatlar törətməyə başladı.
Ermənistan rəhbərliyinin son açıqlamaları da göstərir ki, onlar bu məsələdə hadisələrin gedişatından razıdırlar. Onların bu razılığının səbəbi isə arxasında duran qüvvələrin dəstəyi ilə bağlıdır.
Məsələn, Ermənistan prezidenti Serj Sarkisyan yanvarın 20-də 2016-cı ilin aprel ayında Dağlıq Qarabağ münaqişəsi zonasındakı cəbhə xəttində 4 günlük məşhur hərbi əməliyyatlarda iştirak etmiş və tərxis olunan hərbçilərlə çay süfrəsi arxasında görüşərək bir sıra mesajlar verib. Sarkisyanın dediklərindən belə məlum olur ki, Dağlıq Qarabağ probleminin həllinə dair aparılan danışıqlar hazırda İrəvanı tam qane edir. "Müharibənin əleyhinə olan beynəlxalq mühit də rəsmi İrəvanın maraqlarına xidmət edir", - deyən Sakisyan status-kvonu mümkün qədər uzatmağa çalışacaqlarına işarə edib. Onun sözlərinə görə, Dağlıq Qarabağın statusu müəyyənləşmədən ətraf torpaqların boşaldılmasından söhbət belə gedə bilməz, çünki Madrid prinsipləri statusun müəyyənləşməsini tələb edir. Beynəxalq vasitəçilər də İrəvanın mövqeyini dəstəkləyir.
Lakin rəsmi Bakının işğalçılara cavabı özünü çox gecikdirməyib. Yanvarın 23-də Müdafiə Nazirliyinin Abşeron rayonunun Pirəkəşkül qəsəbəsində "N" hərbi hissəsinin yeni inşa edilmiş hərbi şəhərciyinin açılışında iştirak edən Azərbaycan prezidenti, Silahlı Qüvvələrin ali baş komandanı İlham Əliyev hərbçilərlə görüşündə deyib ki, ilk növbədə Azərbaycanın ərazi bütövlüyü bərpa edilməlidir: "Biz heç vaxt Azərbaycan ərazisində ikinci qondarma erməni dövlətinin yaranmasına icazə verməyəcəyik. Dağlıq Qarabağa heç vaxt müstəqillik verilməyəcək! Əgər kimsə bunu gözləyirsə, qoy əbəs yerə gözləməsin! Bu, olmayacaq! Dağlıq Qarabağ Azərbaycan torpağıdır. Həm tarix, həm də bütün dünya birliyi belə qəbul edir".
Prezident İlham Əliyevin hərbçilərlə bugünkü toplantısında dediyi sözlərə görə isə, ordumuzda ruh yüksəkliyi var, vətənpərvərlik hissləri çox yüksək səviyyədədir və ordumuzun döyüş qabiliyyəti bu gün dünya ictimaiyyəti tərəfindən də yüksək qiymətləndirilir: "Bu gün dünya da bilir ki, sözün əsl mənasında həm döyüş qabiliyyəti, həm hərbi-texniki təminat baxımından Azərbaycan Ordusu güclü ordular sırasındadır".
Məhz bu amilə əsaslanan dövlət başçısı yanvarın 10-da keçirilən iclanda bəyan etmişdi ki, Azərbaycan bu problemi istəyinə uyğun həll edəcək: "Biz həmişə olduğu kimi, konstruktiv mövqe tuturuq, haqq-ədalət bizim tərəfimizdədir, beynəlxalq hüquq normaları da həmçinin. Tarixi həqiqət də bizim mövqeyimizi möhkəmləndirir. Hərbi güc də, iqtisadi potensial da, siyasi nüfuz da bizdədir. Yəni, biz məsələni istədiyimiz kimi həll edəcəyik. Bizim istəyimiz ölkəmizin ərazi bütövlüyünü bərpa etmək, işğal altında olan bütün torpaqlarda Azərbaycan bayrağını qaldırmaqdır. Budur, bizim məqsədimiz və biz bu məqsədə doğru irəliləyirik. Aprel döyüşləri bu istiqamətdə çox önəmli tarixi addım olmuşdur".
Mənbə: milli.az
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş