Ən varlı ölkənin ən zavallı insanları: "Həyatımız bizə qarşıdır" - FOTO
Nə qədər çalışsalar da, bir o qədər yolxsullaşırlar. Aclıq, yoxsulluq, səfillik, ümidsizlik, hirs, sinir, pərişanlıq.
Bura ABŞ-ın Missisipi ştatı, Missisipi çayının deltasıdır.
Burada yaşayanların 40 faizi yoxsulluq səviyyəsindən aşağıda ömür sürürlər.
Birləşmiş Ştatlarda federal miqyasda yoxsulluq səviyyəsi 15 faizdən artıq deyib.
"Delta" adlandırılan məkanda isə vəziyyət fəlakət, faciə həddindədir.
Yerli sakinlərin tam əksəriyyəti yoxsullardır.
Onlar işləmək istəmədikləri üçün belə acınacaqlı həyat sürmürlər.
Tam əksinə.
Məsələn, Otibehiya Allen iki yerdə işləyir. Amma övladlarına yemək pulunu güclə çatdırır.
ABŞ-da ən yoxsul vətəndaşlara verilən "Medicare" dövlət tibb sığortasının ləğv olunması ilə bağlı işlər gedir.
Belə olarsa, "Delta" sakinlərini nə gözləyir - təxminləmək belə, çətindir.
Otibehiya Allen Missipi çayının deltasında, soya və pambıq tarlalarının arasında doğulub, böyüyüb, yaşayır.
O, övladlarını təkbaşına böyüdür.
Furqonda yaşayırlar və yay aylarında bu "treyler-ev" saunaya dönür, çünki xarab olmuş kondisioneri təmir etmək, yaxud yeni kondisioner almaq üçün Otibehiyanın pulu yoxdur.
5 övlad anası olan Allenin dediyinə görə, övladlarına, sadəcə, yemək pulunu tapmaq üçün həftədə 30 saatdan çox çalışır: "Həm "call center"də işləyirəm, həm də klinikada nəqliyyat dispetçeri kimi çalışıram. İki yerdən maaş alıram, amma yeməyə güclə çatır".
Allenin maşın almağa pulu yoxdur. "Delta"da isə ictimai nəqliyyat yox səviyyəsindədi.
Missisipi deltasında yoxsullar əksəriyyət etibarilə "Sunflower county" ("Günəbaxan bölgəsi") adlanan məkanda yaşayırlar. Burada əmək qabiliyyətinə malik 26407 nəfərin 40 faizi işsiz, 70 faizi yoxsuldur.
Missisipi ştatının 3 milyon sakininin 35 faizi qaradərililərdir.
"Delta"da yaşayanlar ərzaq almaq üçün 21 km uzaqlıqdakı Klarksdeyl şəhərinə yollanmaq məcburiyyətindədir.
"5 uşağı böyütmək asan deyil. Yox, anlayıram ki, kimsə məndən bu qədər uşaq doğmağı tələb etməyib. Mən belə qərar verdim və deməli, bu uşaqlara görə mən cavabdehəm. Yaşamaq, yaşatmaq isə çətindir", - Allen ağlayır.
49 yaşlı pediatr Barbara Riks də "Delta"da doğulub, burada böyüyüb.
O da yoxsul yaşayır.
"Yoxsulluq yalnız sosial problem yox, həm də tibbi problemdir. Burada yaşayanların yaşamı, sanki, onlara qarşıdır. ABŞ dünyanın ən varlı, ən qüdrətli ölkəsi sayılır. Amma biz ən qüdrətli ölkənin ən naəlac, ən zavallı, ən yoxsul insanlarıyıq. Vaşinqtonda oturanlar niyə bizi görmək, səsimizi eşitmək istəmirlər", - Barbara Riks qəhərlənərək söyləyir.
(milli.az)
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş