Gürcüstana gedənlərə şad xəbər
Gürcüstana yol 50 km qısalacaq
Gürcüstana gedənlərə şad xəbər var. Bu günlərdə Dövlət Gömrük Komitəsi Tovuz Gömrük İdarəsinin Gürcüstanla sərhəddə yerləşən "Sınıq Körpü" gömrük keçid məntəqəsində Azərbaycan və Gürcüstan gömrük orqanları nümayəndə heyətlərinin görüşü keçirilib.
Sonxeber.az-ın məlumatına görə, nümayəndə heyətləri hər iki ölkənin gömrük orqanlarının rəhbərləri arasında "Sadıxlı" keçid məntəqəsinin fəaliyyətinin bərpası ilə bağlı görüşlərin keçirilməsinə dair razılıq əldə edib. Daha sonra tərəflər "Sadıxlı" və "Mtkvari" keçid məntəqələrindəki vəziyyətlə tanış olublar. Bildirilib ki, hazırda bölgədə həyata keçirilən irimiqyaslı layihələr, eləcə də turizm potensialının gücləndirilməsi ilə əlaqədar tədbirlər nəticəsində sərhəddən keçən sərnişinlərin, yüklərin və nəqliyyat vasitələrinin ciddi artımı müşahidə olunur. Ona görə də, bu istiqamətdə gömrük xidmətinin keyfiyyətinin daha da yaxşılaşdırılması, sərhəddən keçidin sürətləndirilməsi və asanlaşdırılması məqsədilə birgə əməkdaşlıq vacibdir. "Sadıxlı" və "Mtkvari" keçid məntəqələrindən sərnişinlərin 24 saat keçidinin təmin olunması üçün lazımi tədbirlərin görülməsi, bu il avqustun 10-dan etibarən isə saat 08:00-dan 20:00-dək yüngül minik avtomobillərinin keçidinin təmin olunması barədə razılıq əldə olunub. Bundan başqa qarşılıqlı maraq doğuran digər məsələlər və əməkdaşlıq perspektivləri müzakirə edilib.
Məlumatı şərh edən "Borçalı" Cəmiyyətinin sədri Zəlimxan Məmmədli deyib ki, "Sadıxlı" keçid məntəqəsi ən aktiv məntəqələrdən biri olub: "Xüsusilə Qardabani rayonu üçün çox əlverişli keçid məntəqəsidir. Qardabanidən "Sınıq Körpü" gömrük keçid məntəqəsinə 15 km, Qazaxa gəlmək üçün isə 110 km yol qət etmək lazımdır. Amma indi "Sadıxlı" keçid məntəqəsi ilə Qardabanidən Qazaxa 50 km yol gələcəklər. Bu da hər bir vətəndaşın iqtisadi durumuna müsbət təsir göstərəcək. Ümumiyyətlə, "Qırmızı körpü"də hər zaman gərginlik, sıxlıq olurdu. Zənnimcə, indi o gərginlik aradan qalxacaq. 2 yüz minə qədər əhali bu sərhəd keçid məntəqəsi ilə gəlib, gedə bilər. Tiflis, Qaraçöp və Qarayazının əksər bölgələrindən Azərbaycana gəlmək üçün bu yol ən qısa və iqtisadi baxımdan sərfəli yoldur. Bu addımın reallaşması çox gözəl olar".
Ekspert Azər Allahverənov da deyib ki, bu, bütövlükdə "Sınıq körpü" sərhəd keçid məntəqəsindəki sıxlığı bir qədər azaltmış olacaq: "Digər tərəfdən bir alternativdir. Gürcüstana getmək istəyən Ağstafa rayon sakinləri məcbur idilər ki, Qazaxa gəlib oradan Gürcüstana keçsin. Lakin indi buna ehtiyac qalmayacaq. Sözügedən qərar sərhədyanı bölgədə yaşayanlar üçün çox əlverişli olacaq".
Müsahibimiz bəyan edib ki, məlum təşəbbüs Gürcüstandan ölkəmizə gələnlərin sayının artmasına təkan verəcək: "Həmçinin bu, Azərbaycanda turizm sektorunun inkişafı deməkdir. Çox müsbət haldır. Yay istirahətlərini təşkil etmək üçün Gürcüstandan Azərbaycana çoxsaylı insanlar gəlir. Sərhədyanı bölgələrdə yaşayanların biri-birilə qohumluq əlaqələri var. Onlar da "Sadıxlı" keçid məntəqəsindən istifadə edəcəklər. Bu alternativin yaranması insanların gediş-gəlişinin asanlaşdırılması istiqamətində çox təqdirəlayiq addımdır".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş