3 nəfəri bıçaqlayan şəxs məhkəməni heyrətə saldı: "Bağışlayıram..."

3 nəfəri bıçaqlayan şəxs məhkəməni heyrətə saldı: "Bağışlayıram..."Bakıda dönərxanada spirtli içki qəbul etmək üstündə 3 nəfərin sağlamlığına ziyan vurmaqda təqsirləndirilən Saleh Şahverdiyevin cinayət işi üzrə məhkəmə başlayıb.

Bakı Ağır Cinayətlər Məhkəməsində hakim Fikrət Qəribovun sədrliyi ilə keçirilən prosesdə prokuror ittiham aktının nəticəvi hissəsini elan edib.

O, bildirib ki, Saleh Şahverdiyev 2017-ci il oktyabrın 10-da sərxoş vəziyyətdə "Şamaxinka" adlanan ərazidə "Tantuni Köz dönər" restoranına gəlib. O, burada özü ilə gətirdiyi spirtli içkini içmək istəyib. Bu zaman restoranda ofisiant işləyən Fərid Ağayev Saleh Şahverdiyevə burada spirtli içkinin qadağan olduğunu bildirib. Tərəflər arasında mübahisə yaranıb. S. Şahverdiyev konyak şüşəsi ilə Fərid Ağayevin boyun nahiyəsinə zərbə endirib.

Daha sonra restorandan çıxarılan Saleh Şahverdiyev qapının ağzında onu ayırmağa çalışan Qədir Məmmədova cibində gəzdirdiyi bıçaqla zərbə vurub. O, hadisə yerindən qaçmağa çalışıb. Bu zaman Q.Məmmədovla restorana gələn Alı Aliyev onun qarşısını kəsib. Saleh Şahverdiyev ona da iki bıçaq zərbəsi vurub.

Təqsirləndirilən şəxsə Cinayət Məcəlləsinin 221.3-cü (xuliqanlıq) və 126.2.4 (sağlamlığa ağır zərbə vurma) maddəsi ilə ittiham verilib.

Saleh Şahverdiyev ittihamlar üzrə özünü təqsirli bilməyib.

O, sərbəst ifadəsində bildirib ki, heç kimi vurmayıb, sadəcə özünü müdafiə edib: "Həmin günü az içmişdim. Sərxoş deyildim. Dönərxanaya girdim. Ofisiantdan qədəh istədim. Gətirdi. Özümlə gətirdiyim konyakdan bir qədər süzdüm. Bu zaman sonradan adını bildiyim Fərid yaxınlaşdı. Dedi ki, burda spirtli içmək qadağandır. Mən də dedim, qadağandısa niyə qədəh gətirirsən? Aramızda mübahisə yarandı. Əl-qol hərəkətləri eləməyə başladı. Yaxamdan yapışdı. Şüşə əlimdəydi. Bu məni vuranda, konyakın şüşəsi ona dəydi. Sonra məni yerə yıxıb, döydülər. Burnumu qırıblar".

S. Şahverdiyev qeyd edib ki, çölə çıxan zaman əvvəllər heç vaxt görmədiyi şəxslə mübahisə edib: "Qədir də məni vurmağa başladı. Cibimdə bıçaq vardı. Cib bıçağı deyildi. Sadəcə, meyvə alanda götürmüşdüm. Sonradan yadımdan çıxıb, cibimdə qalıb. Özümü qorumaq üçün bıçağı çıxardıb, havada oynatmışam. Ola bilər ki, həmin vaxtı bıçaq ona sürtüb".

3 nəfərə xəsarət yetirən şəxs deyib ki, Alı Alıyevi də bıçaqlamaq fikri olmayıb: "Hadisə yerindən Alatavaya tərəfə qaçırdım. Bu zaman dalımca gəlirdilər. Həmin yerdə məni təkləmək istədilər. Bıçağı yenə havada fırlayırdım. Məqsədim özümü müdafiə etmək idi. Orda Alı Alıyevə bıçaq dəydiyini xatırlamıram".

Daha sonra prosesdə zərərçəkmiş şəxslər ifadə verib. Fərid Ağayev bildirib ki, Saleh axşam saatlarında restorana gəlib: "Dönər sifariş etmişdi. Bu zaman məndən badə istədi. Verdim. Gördüm ki, cibindən spirtli içki çıxarır. Yaxınlaşıb, mədəni şəkildə dedim ki, restoranda nə spirtli içki satılır, nə də kənardan gətirilməsinə icazə var. Başladı mənimlə mübahisə etməyə və şəxsimə nalayiq ifadələr işlətməyə. Bir neçə dəfə xəbərdarlıq elədim. Bu zaman Saleh konyak şüşəsi ilə boyun nahiyəmə zərbə endirdi. Ayaq üstə qaldım, qayıdıb onu yumruqla vurdum. Yerə yıxıldı. Kənarda olanlar bizi ayırdı. Sonra heç mən çölə çıxmadım. Kassanın yaxınlığında qaldım. Onu çölə çıxartdılar".

Bu zaman təqsirləndirilən şəxs zərərçəkənin danışdıqlarının yalan olduğunu deyib: "Kişisən, bədənində kişi qanı axır. Yalan danışırsan. Mən sənə həmin şüşə ilə vursaydım, sən ayaq üstə qala bilməzdin".

Zərərçəkmiş Fərid Ağayev isə qeyd edib ki, hadisə ilə bağlı videogörüntülər var: "Bax, bura gəlmişdim ki, səndən şikayətçi olmayım. Belə heç kimə lazım deyil ki, gedib sən illərlə içəridə yatasan. Amma adamın üzünə elə durursan ki, sanki biz günahkarıq".

Bu zaman təqsirləndirilən Saleh Şahverdiyev zərərçəkəni bağışladığını deyib: "Əşi, balaca qardaşımdır, mən onu bağışladım, Allah da bağışlayar".

Bu zaman hakimlər və proses iştirakçıları təqsirləndirilən şəxsin dediklərini heyrətlə qarşılayıblar.

Hakim təqsirləndirənə başa salıb ki, onu zərərçəkəni yox, zərərçəkən onu bağışlamalıdır: "A kişi, sən danışırsan? Sən bu işdə təqsirləndirilənsən, o yox. Xahiş et ki, Fərid səni bağışlasın".

Prosesin davamında digər zərərçəkən Qədir Məmmədov ifadə verərək bildirib ki, hadisə günü qonşusu Alı Alıyevlə gecə yürüşündən sonra dönər yemək üçün restorana gediblər: "Həmin gün günorta içmişdik. Sonra axşamüstü çıxdıq, gəzdik. Dedik ki, çıxaq "Şamaxinka"da dönər yeyək. Yemək yeyib çıxırdıq ki, dava düşdü. Baxdım ki, bir nəfər döyülür. Araladım, çölə çıxardım. Orada maşınlara baxan bir oğlan vardı, o da Salehi döymək istəyirdi. Mən də qoymadım. Saleh də çox içmişdi. Özündə deyildi, onların üstünə getmək istəyirdi. Bu zaman məni söyməyə başladı. Dedim sərxoşdur, yola verdim. Maşınıma minib, aralanmaq istəyirdim ki, yenə qabağıma keçdi, başladı təhqir etməyə. Düşüb əlimin içi ilə ona bir zərbə vurdum. Bu zaman məni bıçaqla vurdu. Birinci hiss etmədim. Bu qaçıb aradan çıxdı. Lakin qarın nahiyəmdə bir ağrı hiss elədim. Baxdım ki, qan gedir. Dalınca qaçdıq. Dedim, vurub hara qaçırsan? Yuxarı 300-400 metr qalxmışdıq ki, onu tutduq. Bıçaqla üstümüzə gəldi.

Gözünə heç nə görünmürdü. Mən yerdən taxta götürmək istəyəndə gördüm ki, yanımdakı Alı Alıyevə 2 bıçaq zərbəsi vurdu. Taxta ilə bir neçə zərbə vurub, bıçağı əlindən alıb, polisə təslim elədik".

Zərərçəkən bildirib ki, təqsirləndirilən şəxsə qarşı heç bir şikayət və tələbi yoxdur: "Olan olub. Həmin hadisəyə görə işimdən olmuşam. Hazırda bir tərəfimdə keyləşmə var. Bıçaq sinirlərimi kəsib. Lakin heç bir şikayətim yoxdur".

Alı Aliyev də Qədir Məmmədov kimi oxşar ifadə verib. O da təqsirləndirilən şəxsə qarşı heç bir şikayət və tələbinin olmadığını deyib.

Proses fevralın 27-də davam edəcək.

Qeyd edək ki, təqsirləndirilən şəxs daha əvvəllər də xuliqanlıq əməlinə görə məhkum edilib.

Mənbə: lent.az

Kriminal   Baxılıb: 2731   Tarix: 24 fevral 2018  

Şikayətiniz varsa Whatsapp: 050 3422489

Facebookda Paylaş



Unvan.az - elanlar sayti

DİGƏR MARAQLI XƏBƏRLƏR