Yad kişi şübhəsi və hamilə qızın... - Lənkəranda ərdən 27 illik arvadına qarşı DƏHŞƏTLİ ƏMƏL

Yad kişi şübhəsi və hamilə qızın... - Lənkəranda ərdən 27 illik arvadına qarşı DƏHŞƏTLİ ƏMƏL Lənkəran rayonunda qısqanclıq zəminində qətl törətməkdə təqsirli bilinən 1968-ci il təvəllüdlü Rüfət Əliyevin cinayət işi üzrə məhkəmə prosesi başa çatıb.

Rüfət Əliyevlə həyat yoldaşı Maygül Əliyevanın arasında tez-tez mübahisə yaranıb. Mübahisənin baş verməsinə səbəb Rüfət Əliyevin işləməməsi olub.

Dava-dalaş və qısqanclıq

Maygül Əliyeva Rüfət Əliyevdən birgə yaşadıqları evdən getməsini tələb edib, ər kimi ona saymazlıq və qadın kimi soyuq münasibət göstərib. Rüfət Əliyev Maygülün bu hərəkətlərini onu başqa kişi ilə görüşüb, xəyanət etməsi ilə əlaqələndirib. Bu şübhələrinə görə o, arvadı ilə mütəmadi olaraq mübahisələr edib.

Rüfət Əliyev 28 mart 2017-ci il tarixdə, saat 08.30-da arvadı ilə birgə yaşadığı Lənkəran rayonu, Səpnəkəran kəndində yerləşən fərdi yaşayış evində növbəti dəfə aralarında yaranmış mübahisə zamanı ona qarşı saymazlıq göstərməsi ilə bağlı iradlarını bildirib.

Qisas qətli

Maygül Əliyeva onu təhqir edib, ondan birgə yaşadıqları evdən getməsini yenidən tələb edib. Buna görə də o, arvadının digər şəxslə cinsi münasibətdə olması qənaətinə gəlib.

Bununla bağlı qisas almaq niyyətilə Maygülü qəsdən öldürmək qərarına gəlib. Bu məqsədlə evin həyətyanı sahəsindən ağac parçasını özü ilə götürən Rüfət Əliyev evin birinci mərtəbəsində yerləşən yataq otağına geri qayıdıb.

O, həmin vaxt yataq otağında olan Maygül Əliyevaya yaxınlaşaraq, ağac parçası ilə onun başına və bədəninin müxtəlif nahiyələrinə ardıcıl olaraq çoxsaylı zərbələr vurub. Maygül Əliyeva aldığı xəsarətlərdən hadisə yerində ölüb.

"Münasibətlərimiz gərginləşib"

İstintaq orqanı tərəfindən Rüfət Əliyevin barəsində Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham elan edilib.

Təqsirləndirilən şəxs qismində ifadə verən Rüfət Əliyev ona qarşı irəli sürülmüş ittiham üzrə özünü qisminə təqsirli bilib. O deyib ki, 1991-ci ildə Maygül Əliyeva ilə ailə quraraq, evlənib: "Maygül ilə olan birgə nikahımızdan iki övladımız olub. Əvvəllər aramızda yaxşı münasibət olsa da, son bir neçə il olardı ki, ailə daxilində ər-arvad kimi münasibətlərimiz gərginləşib. Səbəb də mənim heç bir yerdə işləməməyim olub".

"Var gücümlə vurmağa başladım"

Rüfət Əliyevin sözlərinə görə, martın 28-də, təxminən saat 08.30-da Maygül yenə də onu evdə görən kimi ünvanına deyinməyə başlayıb, birbaşa üzünə qarşı onu görən gözü olmadığını, evdən getməsini istədiyini deyib: "Mən hövsələdən çıxdım, əsəbiləşdim. Buna görə də aramızda mübahisə yarandı. Həmin vaxt həyətə çıxarkən evin eyvanının döşəməsinin altındakı dəmir tirin üstündəki ağac parçasını götürdüm. Sonra Maygülün olduğu otağa keçərək, əlimdəki həmin ağac parçası ilə Maygülün başına bütün gücümü toplayaraq, dalbadal güclü zərbələr vurmağa başladım".

"Maygülün başından qan açıldı"

Rüfət Əliyev bildirib ki, bu zaman Maygül əlləri ilə başını tutub, özünü qorumaq istəyəndə ağac parçasının zərbələri onun əl-qoluna dəyib: "Həmin vaxt hirsləndiyim üçün Maygülə təxminən 8-10 zərbə vurdum. Ağac parçası ilə Maygülün başına vurarkən, Maygül qışqırdı. Maygül "o nədir məni vurursan?", deyə bildirdi. Maygülə əhəmiyyət vermədən zərbələri vurmağa davam etdim. Zərbələri vurandan sonra Maygülün başından qan açıldı, özü isə huşunu itirərək, döşəməyə yıxıldı".

"Törətdiyim cinayəti etiraf etdim"

Rüfət Əliyev qeyd edib ki, Maygülün ölmüş olduğuna əmin olub: "Sonra ev telefonunun dəstəyini kənara qoydum ki, zəng edən olsa, məşğul göstərsin. Həmçinin Maygülün istifadəsindəki mobil telefon aparatını da söndürdüm. Sonra da evdən çıxaraq yol maşını ilə Lənkəran şəhərinə gəldim. Lənkəran şəhərində gəzişərkən polis əməkdaşı mənə zəng etdilər, polis şöbəsinə gəlməyimi tələb etdilər. Sonra polis şöbəsinə gedərək törətdiyim cinayəti etiraf etdim".

Təqsirləndirilən şəxsin ifadəsinə görə, Maygülə zərbələr vurarkən ona əzab və işgəncə vermək niyyəti olmayıb. O, Maygül Əliyevanı öldürdüyünə görə peşmançılıq keçirdiyini deyib.

"Anama zəng çatmadığından narahat oldum"

Cinayət işi üzrə zərərçəkmiş şəxsin hüquqi varisi qismində dindirilən Səbinə Əlizadə ifadəsində göstərib ki, atası Rüfətlə anası Maygülün aralarında narazılıqlar olub: "Səbəbi anamın atama işləməməsini irad tutması idi. Martın 27-də anama zəng vurdum, hamiləliyim ilə əlaqədar həkimə getmək istədiyimi dedim. Razılaşdıq ki, martın 28-də bir yerdə həkimə gedək. Həmin gün gecə anam mənə "sabah həkimə gedərik, səhər mənə zəng vurarsan" məzmunlu mesaj yazıb. Həmin mesajı ertəsi gün yuxudan oyandıqdan sonra gördüm. Saat 09-da anama dəfələrlə zəng vursam da, onun telefonuna zəng çatmadı. Bundan narahat oldum. Bu səbəbdən qardaşım Rəşid Əlizadəyə zəng vuraraq, anamın telefonuna zəng çatmadığını və Rəşiddən harada olduğunu soruşdum. Rəşid babası Akifin evində olduğunu dedi".

"Anamın atam tərəfindən öldürüldüyünü bildim"

Səbinə Əlizadə bildirib ki, həmin vaxt qardaşından evə gedib, nə baş verdiyini öyrənməsini xahiş edib: "Özüm isə Lənkəran şəhərinə həkimə getdim. Həmin gün günorta vaxtı Rəşid mənə zəng vuraraq, anamın evdə qan içində, ağır vəziyyətdə olduğunu dedi. Mən də ərim Səxavətə zəng vuraraq, onunla anamın yaşadığı evə getdim. Orada anamın atam tərəfindən öldürüldüyünü bildim".

Lənkəran Ağır Cinayətlər Məhkəməsinin hökmü ilə Rüfət Əliyev 17 il müddətinə azadlıqdan məhrum edilib. Hökmdən narazı qalan Rüfət Əliyev apelyasiya şikayəti verib.

Rüfət Əliyev apelyasiya şikayətində etdiyi əməlləri səmimi etiraf etməsini, həmin əməli onun səhhətində anadangəlmə mövcud olan psixi pozuntular səbəbindən etdiyini, hazırda əməlindən peşman olduğunu, cinayət əməlini onun sağlamlığında mövcud olan xəstəliklər səbəbindən törətdiyini nəzərə alınmasını istəyib.

Rüfət Əliyev barəsində olan cinayət işinə yenidən baxılmasını və barəsində ədalətli qərar çıxarılmasını xahiş edib.

Rüfət Əliyevin şikayəti araşdırılması üçün Şirvan Apelyasiya Məhkəməsinə göndərilib. Hakim Kamil Bəşirovun sədrliyi ilə baş tutan iclaslarda Rüfət Əliyevin apelyasiya şikayətinin dəlilləri araşdırılıb.

Apelyasiya şikayətinin dəlillərini araşdıran hakim heyəti sonda qərar elan edib. Qərara görə, Rüfət Əliyevin apelyasiya şikayəti təmin edilməyib.

publika.az

Sonxeber.az