Neftin qiyməti ilə bağlı BƏDBİN PROQNOZ

Bu gün "AzeriLight" markalı neftin 1 barelinin dəyəri 0,29 dollar və ya 0,39% artaraq 75,25 dollar təşkil edib.

Bəs neftin qiymətində bu yüksəlmələr nə zamanadək davam edəcək?

İqtisadçı-ekspert Natiq Cəfərli Sfera.az-a açıqlamasında neftin qiymətinə təsir edən amillərdən danışıb:

"Neftin qiymətinin artması siyasi səbəblərdən, hərbi vəziyyətdən qaynaqlanır. Siyasi gərginlik, dünyada baş verən hadisələr, Suriya və İraqda davam edən müharibələr, Səudiyyə Ərəbistanla Yəmən arasındakı münasibətlər neftin qiymətinin qalxmasına təsir edib. Ötən gün neftin qiymətinin qalxmasına əsas təsir edən amil də Yəməndə Husilər tərəfindən Səudiyyə Ərəbistana edilən raket hücumu idi".

N.Cəfərlinin sözlərinə görə hələlik, neftin qiymətinin qalxmasında iqtisadi faktorlar önə çıxmayıb:

"Yeganə iqtisadi səbəb OPEC ölkələri ilə birgə Rusiyanın hasilatı azaltması haqda olan proyektidir. OPEC ölkələri və Rusiya gündəlik hasilatı 1 milyon 800 min barelədək azaltmışdı. Bunun əvəzində isə artıq Amerika və Kanada hasilatı artırıb. 2 il öncə bu qərar verilərkən Amerikada gündəlik hasilat 8.4 milyon barel idisə, bu gün həmin rəqəm 10.5 milyon barelə qalxıb. Təkcə Amerika 2 milyonadək hasilatı artırıb. Kanada da hasilatda 1 milyonadək artım olub".

N.Cəfərlinin sözlərinə görə siyasi gərginlik davam etdikcə neftin qiymətində artım olacaq:

"Lakin bu proses uzun sürə bilməz. Dünya daim gərginlik içində yaşaya bilməz. Müharibələr səngidikcə neftin qiymətində azalmaları müşahidə edəcəyik. Neft hasil edən ölkələrlə neft istehsal edən ölkələr arasında ortaq bir qərar var ki, neftin 55-60 dollar olması hər kəs üçün sərfəlidir. Düşünürəm ki, yay aylarından etibarən gərginlik səngidikcə neftin qiyməti 55-60 dollar təşkil edəcək".

Telegramda izləyin

instagramda izləyin