Turizm sektoru pandemiyadan əvvəlki səviyyəyə nə zaman qayıdacaq? - AÇIQLAMA
Pandemiya dövründə ən çox zərər çəkən sahələrdən biri də turizm sahəsi oldu. Karantinlə bağlı müəyyən məhdudiyyətlər aradan qaldırılsa da turizm sektorunda vəziyyət hələ də qaneedici səviyyədə deyil. Bəs görəsən bərpa olma prosesi nə vaxta gözlənilir?
Mövzu ilə bağlı Sonxeber.az-ın suallarını turizm sahəsi üzrə ekspert Ceyhun Aşurov cavablayıb. Ekspert bildirib ki, beynəlxalq idman yarışlarının keçirilməsi bu sahədə müəyyən irəliləyişə səbəb ola bilər: "Azərbaycanda turizm sahəsində müəyyən məhdudiyyətlərin aradan qalxması gözlənilir. İyun ayından etibarən "Formula-1", daha sonra isə Avropa futbol oyunlarının keçirilməsi nəzərdə tutulub. Artıq yoluxanların sayında da müsbət tendensiya müşahidə olunur. Bu tədbirlərin təsdiq olunması müəyyən yumşalmaların olacağından xəbər verir. Çünki bu qərarlar xaricdən turistlərin ölkəmizə gəlməsinə müsbət təsir edəcək. Hazırki qaydalara görə, heç bir xəstəliyi olmayan və analiz nəticəsi olan şəxslər ölkəyə müstəqil şəkildə gələ bilmir. Bunun üçün turistlərin xüsusi icazəsi və 48 saat ərzində aktiv PCR test analizi olmalıdır. Düşünürəm ki, bu tədbirlərin keçirilməsi ölkəyə gələn turist axınına müsbət təsir edə bilər".
Ekspert bildirib ki, daxili turizmdə müəyyən irəliləyiş var: "Növbəti aylarda ölkəyə az da olsa turist axını gözlənilir. Hazırki vəziyyətdə daha çox daxili turizm aktivdir. Amma daxili turizmin qiymətləri əvvəlki illərlə müqayisədə daha bahadır. Bununla yanaşı erkən rezervasiyalar qeydə alınır".
C.Aşurov qeyd edib ki, ilin sonuna qədər turizm sektoru pandemiyadan əvvəlki səviyyəyə qayıda bilər: "Ümumdünya Səhiyyə Təşkilatının bu məsələ ilə bağlı bir neçə senarisi var. Optimist senarilərə əsasən bu ilin sonuna kimi əksər məhdudiyyətlər aradan qaldırılacaq. Hazırda vaksinasiya prosesinin sayı və coğrafiyası genişlənməkdədir. Yoluxma sayı kəskin azalarsa növbəti mərhələdə turizm sektoru qısa müddətdə bərpa oluna bilər".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş