"Qazaxın 4 kəndinin qaytarılması Müzəffər Ali Baş Komandan İlham Əliyev diplomatiyasının qələbəsidir" - DEPUTAT

Xəbər verdiyimiz kimi Qazaxın 4 kəndinin Azərbaycana qaytarılması barədə Ermənistanla razılıq əldə edilib. Bu barədə aprelin 19-da keçirilən Azərbaycan ilə Ermənistan arasında dövlət sərhədinin delimitasiyası üzrə Dövlət Komissiyası və Ermənistan ilə Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın səkkizinci görüşündə razılıq əldə olunub. Belə ki, delimitasiya prosesinin ilkin mərhələsində tərəflər sərhəd xəttinin ayrı-ayrı hissələrinin Sovet İttifaqı çərçivəsində onun süqutu dövrünə mövcud olduğu hüquqi cəhətdən əsaslandırılmış respublikalararası sərhədə uyğun olaraq Bağanis (ER) - Bağanis Ayrım (AR), Voskepar (ER) - Aşağı Əskipara (AR), Kirants (ER) – Xeyrimli (AR) və Berkaber (ER) - Qızılhacılı (AR) yaşayış məntəqələri arasında bilavasitə keçməsini razılaşdırıblar.

Bununla bağlı Sonxeber.az-a danışan deputat Nəsib Məhəməliyev bildirib ki, Rusiya sülhməramlılarının vaxtından əvvəl Qarabağı tərk etmələri və ardınca Qazax rayonunun 4 kəndinin qaytarılması barədə razılığın əldə olunması ilk növbədə Prezident, Müzəffər Ali Baş Komandan İlham Əliyev diplomatiyasının, Azərbaycan xalqının qələbəsidir:

"2016-cı ilin aprel ayından bəri yazılmağa başlanan şərəfli tarixin, silsilə qələbələrin davamıdır. Xalqımızı, bu möhtəşəm qələbələr təbrik edirəm. 4 kəndin qaytarılması ilə delimitasiya və demarkasiya işlərinə başlandı. Bu da o deməkdir ki, iki ölkə arasında dayanıqlı sülhün əldə olunması üçün möhkəm zəmin yaradılır. Son zamanlar, Ermənistanı silahlandırmaqla, yeni müharibəyə sürükləmək istəyən qüvvələrin sayı artmaqda idi. Bəziləri sülhməramlıların bölgəni tələsik tərk etmələrini də bununla əlaqələndirirdilər. Əksinə, hesab edirəm ki, 4 kəndin qaytarılması ilə proseslər müsbət istqamətdə cərəyan edəcəkdir".

Telegramda izləyin

instagramda izləyin