Paşinyanın xanımına SƏRT ETİRAZ

Xəbər verildiyi kimi, oktyabrın 8-də Ermənistanın baş naziri Nikol Paşinyanın arvadı Anna Akopyan bir qrup rusiyalı qadınla birlikdə Azərbaycanın işğal altındakı ərazilərinə, qoşunların təmas xəttinə gəlib. Anna Akopyan bu səfəri özünün "Qadınlar sülh naminə" sülhməramlı təşəbbüsü çərçivəsində təşkil edib. O, təmas xəttində Qarabağ münaqişəsinin tərəflərinə müraciətlə "sülhə çağırış" edib.

Bu səfər Azərbaycanda hiddətlə qarşılandı və rəsmi Bakı Akopyanın bu addımına etirazını bəyan etdi.

"Qadınlar sülh naminə" təşəbbüsü barədə artıq səsləndirilmiş mövqeyimizə əlavə olaraq təkrar edirik ki, sülh istəyənlər müharibəni davam etdirməməli, insan itkisinin qarşısını almaq istəyənlər digər dövlətin ərazilərini hərbi işğal altında saxlamamalı və nəhayət, qadınları və anaları sülhə dəvət edənlər şəxsən öz övladlarını Azərbaycanın beynəlxalq tanınmış ərazilərinə hərbi xidmətə göndərməməlidirlər", - deyə XİN-in açıqlamasında bildirilirdi.

Səfərə etiraz olaraq səsləndirilən bəyanatlardan daha biri Dilarə Əliyeva adına Qadın Hüquqlarının Müdafiə Cəmiyyətinin sədri Novella Cəfərovadan gəldi.

Dağlıq Qarabağa səfər edən bir qrup rus qadınına müraciət edən N.Cəfərova sülh libasına geyindirilmiş bu tip demarşın ədalət anlayışının özünə əks olduğunu bildirib.

"Ermənistanın baş nazirinin həyat yoldaşı Anna Akopyanın "Sülh naminə qadınlar"-ı təşəbbüsünün çərçivəsində təşkil olunmuş Azərbaycanın işğal altındakı əraziləri olan Dağlıq Qarabağa səfəri zamanı siz tərəflərə sülh çağırışı etdiniz.

Sülh libasına geyindirilmiş bu tip demarş ədalət anlayışının özünə əksdir. Danılmaz faktdır ki, Ermənistan-Azərbaycan münaqişəsinin zərərçəkmiş tərəfi məhz Azərbaycandır. Məhz Azərbaycanın əraziləri 25 ildən artıqdır ki, Ermənistanın silahlı birləşmələrinin işğalı altındadır. Eyni zamanda məhz Azərbaycanın işğal altındakı torpaqlarında olmaq və Azərbaycanın sülh üçün iradəsinin olmamasını qeyd etmək qeyri-səmimiliyin və sinizmin bariz nümunəsidir. Sülh quruculuq fəaliyyətini ilk öncə Ermənistan cəmiyyətinin özündən başlamaq lazımdır, hansı ki, öz silahlı birləşmələrini işğal altındakı torpaqlardan çıxarmalı və məcburi köçkünlərin öz torpaqlarına qayıtması üçün şəraitin yaradılmasının vacibliyini anlamalı və qəbul etməlidir.

Bu ərazilərdə sizin olmağınız işğal faktını birbaşa vurğulamaq və təmas xəttini sərhəd xəttinə çevirməyin demonstartiv cəhdidir. Rusiyanın vətəndaşlarının, xüsusilə Rusiyanın Dövlət Duması Beynəlxalq Əlaqələr Komitəsi sədrinin birinci müavini - Svetlana Jurova və başqaların bu oyunda iştirak etməsi təəccüb və dərin təəssüf doğurur.

Sülh quruculuq çox incə və həssas alətidir. Sülh haqqında danışarkən, ilk növbədə, qarşı tərəfin hissləri, dəyərləri, maraqları və hüquqlarını nəzərə almaq vacibdir. Sülhməramlılıq maskasının arxasında gizlənən, torpaqlarımızın işğalını qanuniləşdirmək məqsədi çəkənlər riskli və çox çirkli olan bir oyuna başladılar.

Bu, xüsusən qarşı tərəfin maraqlarını nəzərə almayan, heç bir real təkliflərlə əsaslandırılmayan sülhquruculuq fəaliyyəti zamanı təhlükəlidir".

Bildirilib ki, bu hal ATƏT-in Minsk Qrupu, hər iki ölkənin digər vasitəçiləri və vətəndaş cəmiyyəti çərçivəsində aparılan danışıqları yoxa bərabər edərək, daha çox gərginliyə səbəb ola bilər:

"Ermənistan və Azərbaycan arasında atəşkəsin gücləndirilməsi üçün müzakirələr aparıldığı zaman, bu addım münaqişənin sülh yolu ilə həll etməyə xidmət edə bilməz, əksinə mənfi informasiya mühiti yaradır.

Möhkəm və ədalətli sülh yolunun axtarışları tarixən xoş qonşuluqda yaşayan Ermənistan və Azərbaycan xalqlarının təcili, müqəddəs vəzifə və hüququdur.

Bu iki xalq bunu hamıdan yaxşı anlayır və regiona, sülh və sabitliyin qaytarılması və münaqişənin dayandırılmasının vacibliyində, etibarlı münasibətlərin bərpasında maraqlıdır.

Ermənistanla Azərbaycan arasında ədalətli sülhün təmin edilməsi üçün gərginliyin yumşaldılması və tərəflər arasında etimadın yaradılması üçün real mexanizmləri tapmaq və inkişaf etdirmək, həmçinin əməkdaşlığı gücləndirmək üçün səyləri artırmaq vacibdir.

Biz torpaqlarımızda sülh, əmin-amanlıq və təhlükəsizliyini bərpa etməyi məqsədi olan bütün təşəbbüsləri dəstəkləyirik. Bununla əlaqadər hər kəsi belə düşünülməmiş addımlardan çəkinməyə çağırırıq"./publika

Telegramda izləyin

instagramda izləyin