Qalmaqal, gözyaşı, 18 məşhur və yenidən 1 maşın... – FOTOLAR

Teleməkanın ən reytinqli verilişi "Maşın" şounun növbəti buraxılışının başlamasına sayılı günlər qalıb. Dekabrın 13-ü müsabiqənin ilk efir günü yayımlanacaq.

Qalmaqal, gözyaşı, mübahisə və həyəcan dolu yarışmada bu dəfə də 18 məşhur maşın uğrunda mübarizə aparacaq. İştirakçıların adı bəlli olmasa da, kişi iştirakçılardan birinin meyxanaçı Ələkbər Yasamallı olacağı gözlənilir. Çünki ötən mövsümdə ilk gün bilmədən əlini maşından çəkdiyi üçün layihənin rəhbəri və aparıcısı Murad Dadaşov meyxanaçını növbəti oyuna dəvət edib.

Bəs hazırlıqlar necə gedir? Tamaşaçıları necə bir şou gözləyir?

Musavat.com məsələ ilə bağlı MGP-nin mətbuat katibi Könül Vəlibəyli ilə əlaqə saxlayıb.

O, bildirib ki, artıq iştirakçılar bəllidir: "Hazırlıqlar gedir. 2-3 ərzində anonsumuz efirə gedəcək. Dekorumuzun 80 faizi hazırdır. Hər gün iclaslar keçiririk ki, şou daha maraqlı olsun. İştirakçılarımız bəllidir. Həmişə maşın şounun mövzusu olur. Bu dəfə də "Maşın" şouda rəngarəng mövzumuz var. Mövzunu isə anonsla birlikdə təqdim ediləcək".

Vəlibəyli deyib ki, ötən mövsümdəki maşının aqibəti də bəlli olacaq: "Bilirsiniz ki, qalib Roza Zərgərli oldu, amma istəmədi. Biz də bu dəfə maşının aqibətini açıqlayacağıq. Onu da deyim ki, 13-ü tamaşaçıları maraqlı şou gözləyir. İlk efir günümüzə xüsusi hazırlaşmışıq. Bu dəfə tam fərqli və möhtəşəm qonaqlar, şou və veriliş olacaq".

Musavat.com

Telegramda izləyin