45 peşə liseyinin məzunları buraxılış imtahanı verəcək

Tələbə Qəbulu üzrə Dövlət Komissiyası (TQDK) martın 13–də ölkənin bütün peşə liseylərinin (cəmi 45) sonuncu sinfində təhsil alan şagirdlər üçün buraxılış imtahanı keçirəcək.

TQDK-nın mətbuat xidmətindən Lent.az-a verilən məlumata görə, imtahan 24 şəhər və rayonda (Bakı, Gəncə, Şəmkir, Gədəbəy, Qazax, Tovuz, Sumqayıt, Abşeron, Şamaxı, Qax, Bərdə, Göyçay, Kürdəmir, Zərdab, Şirvan, Sabirabad, Biləsuvar, Salyan, Saatlı, Lənkəran, Cəlilabad, Quba, Qusar, Xaçmaz) təşkil olunacaq.

İmtahanlarda iştirak edəcək şagirdlər "İmtahana buraxılış vərəqəsi"ni TQDK-nın internet saytında "Şagird-Məzun" sisteminə müvafiq qaydada daxil olmaqla çap edə bilərlər.

Nəzərinizə çatdıraq ki, imtahan bütün binalarda eyni vaxtda – saat 12:00-da başlanacaq və 2 saat 45 dəqiqə müddətində aparılacaqdır.
Şagirdlər imtahana gələrkən imtahana buraxılış vərəqəsini, şəxsiyyəti təsdiq edən sənədin əslini, əcnəbilər şəxsi pasportları və ya icazə vəsiqələrini, vətəndaşlığı olmayan şəxslər şəxsiyyət vəsiqələrini və ya icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini, 16 yaşı 2016-cı il fevralın 29-dək tamam olmayan şagirdlər, digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışını(arayışa şagirdin 3X4 sm ölçülü şəkli yapışdırılır və şəkil möhürlə təsdiqlənir) mütləq gətirməlidirlər.
Məlumat üçün bildirək ki, imtahanın aparılması üçün 30 imtahan mərkəzi ayrılıb. Prosesin idarə edilməsinə 39 imtahan rəhbəri, 363 zal nəzarətçisi cəlb olunub.
İmtahanlarda ümumilikdə 4448 şagirdin (Bakıda 1917, Gəncədə 344, Şəmkirdə 68, Gədəbəydə 98, Qazaxda 77, Tovuzda 111, Sumqayıtda 406, Abşeronda 124, Şamaxıda 60, Qaxda 85, Bərdədə 176, Göyçayda 123, Kürdəmir 61, Zərdabda 37, Şirvanda 94, Sabirabadda 95, Biləsuvarda 27, Salyanda 90, Saatlıda 98, Lənkəranda 38, Cəlilabadda 98, Qubada 80, Qusar 57, Xaçmazda 84) iştirak edəcəyi gözlənilir.

Telegramda izləyin