Oğlan tələbələr nə üçün kirayə mənzil tapmaqda çətinlik çəkir? - Ekspertdən AÇIQLAMA

Tədris ilinin başlanmasına qısa müddət qalmasında baxmayaraq, hələ də ev tapa bilməyən tələbələr var. Məlumdur ki, tədris müəssələrində dərslər başlayanda kirayə evlərin qiyməti də qalxır. Bu da təbii ki, tələbələrə çətinlik yaradır. Tələbə oğlanlar üçün vəziyyət daha çətindir. Çünki, onlar təkcə qalacaqları evin yüksək kirayə haqqı problemi ilə qarşılaşmırlar. Həmçinin, ev sahiblərinin əksəriyyəti tələbə qızlara üstünlük verir. Bunu "Qızlar üçün kirayə ev verilir" kimi əksəriyyət elanlarla sübut etmək mümkündür. Lakin, qızlar da kirayə mənzil tapmaqda müxtəlif çətinliklərlə qarşılaşırlar.

Sonxeber.az -a açıqlama verən, 19 yaşlı tələbə Rəvanə Lalayevanın sözlərinə görə, əsas problem şəraiti zəif olan evin baha qiymətə kirayə verilməsidir. Bundan əlavə, mənzil sahibləri kirayə ev verərkən mütəmadi olaraq mənzilin təmiz saxlanması ilə bağlı xəbərdarlıq edirlər.

23 yaşlı tələbə Vüqar Qurbanov isə təhsil aldığı müddət ərzində kirayə qaldığı evlərin sayını artıq unudub. O hər dəfə bir problem yaşayaraq evdən ayrılmaq məcburiyyətində qalıb:

"Gah qonşuların şikayəti, gah da evdəki əşyaların korlanması tez-tez mənzil sahibi tərəfindən irad tutulan səbəblər olub. Elə vaxt olub ki, kirayə qaldığım evdə növbəti dəfə də qalmaq istəmişəm. Lakin, qiymətin büdcəmə uyğun gəlməmə səbəbindən evi dəyişmək məcburiyyətində qalmışam.

Sözügedən mövzu ilə bağlı Sonxeber.az-a açıqlamasında əmlakçı Zamiq Rzayev eyni problemin hər il yaşandığını qeyd edib. O bildirib ki, tələbələrin evi təmiz saxlaya bilməməsi başlıca problemlərdəndir:
"O cümlədən, evdə yaranan səs-küy səbəbindən qonşular şikayət edir, evdəki əşyalarla olduqca kobud rəftara görə mənzil sahibləri artıq tələbələrə ev vermək istəmir. Buna görə də, bir çox mənzil sahibi evdə tək yaşayacaq tələbələrə kirayə ev verir. Lakin, tək qalmaq da maddi baxımdan heç bir tələbə üçün əlverişli deyil".

Ekspert qiymətlərlə bağlı da fikir bildirib. Onun sözlərinə görə, qiymətlər baha olduğu üçün ev tapmaq daha da çətinləşib: "Qiyməti ev yiyəsi öz istəyinə uyğun olaraq müəyyən edir. 1 otağı 200 azn-ə də, 300- 350 azn- ə verən də olur".

Zamiq Rzayev tələbələr ev seçərkən daha ucuz başa gəlməsi üçün şəhərdən kənar məkanlara üstünlük verdiklərini bildirib :

"Onlar adətən Xırdalan, Masazır, Binəqədi ,Yeni Yasamal və Sulutəpə ərazilərində kirayə ev axtarırlar. Qızlar daha çox bina evinə üstünlük verdiyi halda, oğlanlar üçün bunun fərqi yoxdur. Əsas ev olsun".

Ekspert onu da qeyd edib ki, azərbaycanlı oğlan tələbələrdən fərqli olaraq xaricdən gələn, hətta, türk vətəndaşları belə rahatlıqla ev tapa bilir: "Bunun əsas səbəbi, mənzil sahiblərinin qiymətlərdən xəbərsiz olan həmin əcnəbi tələbələrə evi baha qiymətə verə bilmələridir. Lakin, sonda onlar da evdən çıxanda mənzil bərbad halda, əşyalar sıradan çıxmış vəziyyətdə olur".

Lamiyə Məmmədova

Telegramda izləyin