"Köklü kadr islahatına ehtiyac var" - Deputat Nazirlər Kabinetindəki dəyişikliklərdən danışdı

Xəbər verdiyimiz kimi Azərbaycan Respublikasının Prezidenti İlham Əliyevin sərəncamı ilə Əli Hidayət oğlu Əsədov Azərbaycan Respublikasının Baş Naziri vəzifəsinə təyin edilib. Yaxın vaxtlarda Nazirlər Kabinetində növbəti dəyişikliklər olacaqmı?

Bununla bağlı BiG.AZ-a danışan deputat Çingiz Qənizadə bildirib ki, məhkəmə-hüquq sahəsində islahatlar dərinləşdirilməlidir:

"Məhkəmə hakimiyyətində kadr islahatlarına ehtiyac var. Bu sahədə cənab prezidentimizin 4 apreldə vermiş olduğu "Məhkəmə-hüquq sahəsində islahatların daha da dərinləşdirilməsi" ilə bağlı fərmanına uyğun olaraq bu proses davam etdirilməlidir. Bunun üçün də köklü kadr islahatına ehtiyac var. Hesab edirəm ki, bu vacib şərtlərdəndir".

Deputat Nazirlər Kabinetində ediləcək dəyişiklərlə bağlı fikir bildirib. O, qeyd edib ki, Əli Əsədov çox sadə, təvazökar, iqtisadiyyatı bilən savadlı kadrdır: "Əli müəllim özünün rəhbərliyi dövründə hansı şərtlərlə, kimlərlə işləmək məsələsini yəqinki cənab prezidentimizlə müzakirə edəcək. Hesab edirəm ki, ölkədə müəyyən kadr islahatları aparılmalıdır. Yeni nəfəs, güc və qüvvə ilə ölkəmizdə aparılan uğurlu sosial, iqtisadi islahatlara dəstək verəcək şəxslər vəzifəyə gətirilməlidir. Novruz Məmmədov öz istəyi ilə istefaya gedib. Nazirlər Kabinetində hansı dəyişikliklərin olacağını bağlı bir söz deyə bilmərəm. Onu zaman göstərəcək. Cənab prezidentimizin seçimi parlament tərəfindən müsbət dəyərləndirildi. Ümid edirəm Əli müəllim cənab prezidentimizin və başqa ona inanan insanların etimadını doğruldacaq".

Telegramda izləyin