Qadına şiddəti dəstəkləyən alim danışdı: "Qadın döyülübsə, buna birtərəfli qaydada yanaşmaq olmaz"

Xoşqədəm Hidayətqızının "Səni axtarıram" proqramında ekspert qismində iştirak edən Sabir Əlihüseynlinin çıxışı birmənalı qarşılanmayıb. Akademikin verilişdə əri tərəfindən döyülən qadın haqqında "Ata-baba misalımız var: "Yüyrək at özünə qamçı vurdurmaz", "Bu qadın döyülübsə, öz günahı olmamış deyildir!" deməsi sosial şəbəkənin qadın istifadəçilərinin etirazı ilə qarşılanıb.
Bununla bağlı Sonxeber.az-a açıqlama verən Sabir Tağıyev (Əlihüseynli) hazırda patriarxal dövrdə yaşadığımızı qeyd edərək məsələyə münasibətini bildirib:
"Bu mənim hoqqabazlığım deyil, dədə- babadan formalaşmış fikirdir ki, yüyrək at özünə qamçı vurdurmaz. Bu o demək deyil ki, qarşıdakı tərəf atdır. Xeyr, elə deyil! Yəni ki, günahkar adam özünə cəza verdirə bilər. Bu mənanı kəsb edir. Əgər burda ziddiyyət yaranıbsa, qadın döyülübsə, buna birtərəfli qaydada yanaşmaq olmaz. Qeyd edim ki, bu şəxslər ər və arvaddırsa, onlar dörd divarın arasında yaşayırlarsa və belə ziddiyyət yaranırsa, deməli nəsə bir səbəb var. Biz matriarxal dövrdə yaşamırıq, patriarxal dövrdə yaşayırıq. Mənim aləmimdə kimin üçün necədir bilmirəm, amma ər-arvad münasibətindən söhbət gedirsə, qadın qadınlıq şərəfini gözləməlidir. Xoşqədəm xanımın işidir ki, verilişdə "ajiotaj" yaratsın. O, hadisələri bilir və sadəcə orda elə bir məqam yaradır ki, fikirlər, ziddiyyətlər yaransın və reallar ortaya çıxsın. Lakin, düşünürəm ki, birtərəfli qaydada o qadına bəraət qazandırmaq düzgün deyil".
Sabir Əlihüseynli qeyd edib ki, əslində məsələ bir az göründüyündən fərqlidir və qızın atasının bu işdə günahı var:
"Biz qızı dinlədik, qız özü danışdı hər şeyi, sirr də orda açıldı. Soruşuram, meşəyə odunla gedərlər, yoxsa meşədən odun gətirərlər? Rusiyaya gedənlərin hamızı istər- istəməz bir qadınla cinsi əlaqədədir. Bunun o tərəf, bu tərəfi yoxdur. Rusiyada yaşayan oğlanların çoxu gedib orada təsir altına düşmək məcburiyyətindədədir. Gedəndə o bir qadınla nigah kəsdirməlidir, təmasda olmaldır ki, orda yaşaya bilsin. Bu real həqiqqətdir. Sizin bilmədiyiniz məsələlər var. Hər "gədə güdə" -yə kişi demək olmaz. Deyilənə görə qızın atası gedib kredit götürüb toy edib və məsələ də bununla bağlıdır . Mən ataya demək istəyirəm ki, "Qızın çoldəmi qalmışdı?" Bilirsiz, ata qorxur ki, qızını alan olmayacaq və məsələni qızın atası məhz gətirib o vəziyyətə salıb. Ona mən və yaxud da sən nə edəsən?
Qeyd edək ki, Sabir Tağıyev (Əlihüseynli) Azərbaycan Milli Elmlər Akademiyasının Memarlıq və İncəsənət İnstitutunun böyük elmi işçisi, fəlsəfə doktoru, pedoqoji elmlər namizədidir. Ziyalının verilişdə qadını atla müqayisə etməsi və şiddəti dəstəkləməsi hər kəs tərəfindən təəssüflə qarşılanıb.

Şəlalə Babayeva

Telegramda izləyin

instagramda izləyin