"Ailədə zorakılıq hallarının səbəbi çox vaxt şüuraltı ilə bağlı olur"-Komitədən AÇIQLAMA
Son dövrlər ailə münaqişələri, xüsusilə həyat yoldaşları tərəfindən döyülən, işgəncələrə məruz qalan hətta öldürülən qadınların sayı çoxalıb. Bununla bağlı sosial şəbəkələrdə müzakirələr olunur, mətbuatda xəbərlər yayılır. Məsələ ilə bağlı dövlət strukturları tərəfindən maarifləndirici addımlar atılmasına baxmayaraq, baş verən hadisələrin sayı azalmaq əvəzinə gündən-günə daha da artır.
Mövzu ilə bağlı Sonxeber.az-a Ailə, Qadın və Uşaq Problemləri üzrə Dövlət Komitəsi Aile hüquqi təminat şöbəsinin baş məsləhətçisi Rahil Süleymanzadə açıqlama verib.
"Son günlərdə ən aktual problemlərden biri də, məişət zorakılığı hadisələrinin kütləvi informasiya vasitələrində yayılmasıdır. Əslində əvvəlki illərə nəzər salsaq görərik ki, məişət zorakılığına məruz qalanların sayı indi daha azdır. Amma bu say bizim üçün yetərli deyil. Bəzi hallarda zorakılıq faktları işgəncələrlə, qadınların və ya uşaqların ölümü ilə nəticələnir. Zorakılıq halları təkcə qadınlara qarşı deyil, eyni zamanda uşaqlara qarşı da törədilir. Rayonların birində belə bir halın şahidi olmuşduq. Azyaşlı uşaqlara qarşı ata və ögey ana tərəfindən zorakılıq halı baş vermişdi. Hadisə ilə bağlı araşdırmalar aparıldı və ciddi tədbirlər görüldü.
Amma məsələnin qaynağının tapılması bizim üçün çox önəmlidir. Bəzən vətəndaşlar iqtisadi cəhətdən ailənin vəziyyətinin aşağı olmasını əsas gətirirlər amma tebii ki, belə deyil. Araşdırmalar zamanı əhali arasında apardığımız sorğulardan, həmçinin komitənin özünə daxil olan müraciətlərdən aydın olur ki, bu heç də iqtisadi səbəblərdən deyil. Bu, insanların vaxtı ilə öz ailələrində baş vermiş məişət zorakılığı hallarındandır. Uşaqlıq dövründə onların şüuraltında artıq bu zorakılıq halı qalır. Artıq ailə qurduqca bunu öz həyat yoldaşına, övladlarına qarşı tətbiq etməyə başlayır. İndinin problemi deyil, bu illər öncə baş vermiş travmalardan əmələ gələn zorakılıq faktlarıdır ki, bunun da qarşısını almaq çox çətindir. Bizim əsas məqsədimiz bu halların qarşısının alınması üçün ilk növbədə maarifləndirmə tədbirlərinin həyata keçirilməsi, onlarla profilaktiki söhbətin aparılması, profilaktiki işin təşkili çox vacib məsələlərddən biridir. Ailə institutunu qoruyub saxlamaq, mütləq şəkildə ailələrlə işləmək lazımdır. Gözəl bir ailəni qoruyub saxlamaq üçün hər bir ailə hazırlıqdan keçməlidir. Ailə institutu təkcə bizim ölkədə deyil, eyni zamanda bütün xarici ölkələrdə də bu institutlar var. Bəzən qadınlar öz hüquqlarını bilmirlər və zorakılığı normal hal kimi qəbul edirlər. İş o yerə çatır ki, qadına qarşı xüsusi amansızlıqla işgəncələr törədilir, ancaq bundan sonra qadın hüquq-mühafizə orqanlarına müraciət etməyə başlayır. Yaxşı olar ki, belə işgəncə halı baş vermədən öncə hüquq-mühafizə orqanlarına və yaxud müvafiq icra hakimiyyəti orqanlarına müraciət edilsin. Təbii ki, bu bəzən qadınların öz hüquqlarını bilməməsi, savadın, təhsilin az olması zorakılıq hallarına gətirib çıxardır.
Hətta dağ kəndlərində maarifləndirmə tədbirlərində iştirak etmişik və vətəndaşların bu məsələyə necə həsas yanaşdıqlarının şahidi olmuşuq. Baş vermiş zorakılığın yeri və zamanı bilinmir. Ümumiyyətlə dövlət tərəfindən bütün şəxslər üçün bərabər şəkildə təhsil imkanları yaradılıb. Baxır, vətəndaş bundan necə istifadə edir. Oxumaq həvəsi olan insan oxuyur və cəmiyyətdə öz yerini, mövqeyini tapır. Maarifləndirmə tədbirlərini həyata keçirərkən xüsusən ucqar dağ rayonlarında, ucqar kəndlərdə də bu fikirləri aydın şəkildə insanlara çatdırırıq. Yaxşı olardı ki, qızlarımız ailə qurmamışdan əvvəl təhsil alsın, işə qəbul olunsun və iqtisadi cəhətdən heç kimdən asılı olmasın. Bu gözəl şərtdir amma baxır vətəndaş bunu necə qəbul edir. Bəzən elə qadınlar olur ki, həyat yoldaşları işləmə deyirsə, işləmir. Belə olduğu zaman heç kəs onu məcbur edə bilməz ki, sən mütləq işləməlisən. Bu, vətəndaşın özünün istəyindən asılıdır. Bu gün dövlət qulluğunda, hüquq-mühafizə orqanlarında, milli məclis deputatları və bələdiyələr arasında kifayət qədər xanımlarımız var və mütəmadi olaraq onların ildən-ilə artır.
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş