"Aqrar sığorta bu hallarda sahibkarları qoruyacaq"-Ekspertdən AÇIQLAMA
"Azərbaycanda aqrar sığorta mexanizmi Türkiyənin TARSİM modelinin təcrübəsi əsasında qurulur".
Bunu Kənd Təsərrüfatı naziri İnam Kərimov Yeni Azərbaycan Partiyasının internet səhifəsinə müsahibəsində deyib:
"Bu il Milli Məclis "Aqrar sığorta haqqında" qanunu qəbul edib, Nazirlər Kabineti isə Aqrar Sığorta Fondunun Nizamnaməsini və "Aqrar sığorta predmetinin tərkibi"ni təsdiqləyib. Bununla da ölkəmizdə ilk dəfə aqrar sığortanın geniş miqyaslı tətbiqi üçün hüquqi baza formalaşıb".
Mövzu ilə bağlı Sonxeber.az-a sığorta eksperti Xəyal Məmmədxanlı danışıb. O, bildirib ki, ötən il iyun ayında "Aqrar sığorta haqqında" qanun qəbul olundu:
"Qanunun əsas məqsədi "aqrar sığorta" sahəsində fermer və sahibkarlarla sığorta şirkətləri arasındakı münasibətləri tənzimləmək, eyni zamanda sahibkarların, aqrar sığorta sahəsində çalışanların risklərinin sığorta vasitəsi ilə neytrallaşdırılması, qorunması mexanizmidir. Amma çoxları düşünürdü ki, bu icbari qanun olacaq. Təbii ki, qanun icbari deyil, könüllü qanundur. Bunu icbari şəkildə bütün fermerlərə,aqrar sahədə çalışan insanlara şamil edilməsi kimi məsələ yoxdur.
"Qanun kimləri əhatə eləməlidir?" sualına ekspert belə cavab verdi:
"Qanun əkin-biçinlə məşğul olanları, bitkilər, bitkiçilik, istixana, balıqçılıq məhsullarını, kənd təsərrüfatı məqsədi ilə yetişdirilən heyvanları, yəni damazlıq heyvanları, və sairə bütün bunların sığortalanmasını əhatə etməlidir".
"Aqrar sığorta hansı hallardan sahibkarları qoruyacaq?" sualını Məmmədxanlı belə cavablandırdı:
"Orada geniş təminatlar var. Bütün təbii fəlakətlərdən, fərqi yoxdur, daşqın, zəlzələ, qasırğa, tufan, yanğınlar, ziyanvericilərin vurduğu zərələr, vəhşi heyvanların hücumu, o cümlədən üçüncü şəxslərin hərəkətləri, yəni qəsdən mala ziyan vurma bütün bunlar sığorta təminatına daxildir. Sığorta riskləri kifayət qədər ciddi risklərdir. Amma problem ondan ibarətdir ki, hələ aqrar sığorta mexanizminin hansı formada işləyəcəyi məsələsi məlum deyil. Hansı sığorta şirkətləri bu işlə məşğul olacaq? Bütün sığorta şirkətləri bu prosesdə iştirak edəcəkmi? Həm də, çox ciddi ekspert problemləri də var. Qeyd edim ki, ekspert problemləri digər sığorta növlərində də var amma bu qədər kəskin bir ehtiyac yoxdur.Çünki, həqiqətən də neçə illər Azərbaycanda kənd təsərrüfatı, aqrar sektor arxa plana atılıb. İnsanlar daha çox kommersiya, ticarət və digər sahələrə meyl ediblər. Ona görə də, indi çox ciddi bir ekspert çatışmazlığı var. Çünki ekspertlər burada həm sığortalanarkən həmin o sığorta obyektinin, mallarının qiymətləndirilməsində, həm də sabah hadisə baş verərkən zərərlərin hesablanmasında iştirak edirlər. Bu da çox spesifik sahə olduğuna görə orada ekspertlərin xüsusi bir təcrübədən keçməsi, ixtisaslaşması lazımdır. O, cümlədən icbari sığorta fondunun nizamnaməsi keçən həftə qəbul olundu.Onun hələ idarəetmə mexanizminin formalaşması və bütün bunlar biraz müddət alacaq. Ona görə də nə qədər effektiv olacaq demək biraz tezdir. Çünki,hələ heç nə bəlli deyil. Sığorta haqları, sığorta məbləğləri, əsas mexanizm məlum olunandan sonra biz deyə bilərik ki, bu sistem yaxşı işləyəcək ya yox".
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş