Qarabağ qazisinin evi uçuruldu, Binəqədi Rayon İcra Hakimiyyəti iddialara cavab verdi-VİDEO

Ötən gün Qarabağ qazisinin evi uçurulub. Bu barədə Sonxeber.az-a şikayət daxil olub. Qarabağ qazisi Natiq Hüseynxanov şikayət edərək bildirib ki, 4 il bundan əvvəl övladlarının ali məktəbə qəbul olması ilə əlaqədar ailəvi olaraq Bakı şəhərinə köçərək, kirayədə yaşamağa başlayıblar. Bu müddət ərzində Binəqədi rayonunda torpaq sahəsi alaraq ev tikməyə başlayıb. Evin hazır olmasına az qaldığı bir müddətdə isə elə bir problemlə qarşılaşıblar ki, indi bu dərdə dözməyib, özünü yandırmaq istəyir:

"Binəqədi rayon icra nümayəndəsi gəlib məndən 5000 azn pul istədi. Mən də bildirdim ki, ikinci qrup Qarabağ əliliyəm. O qədər pulum yoxdur. 2000 azn verə bilərəm. Daha sonra evi tikib qurtarandan sonra pensiyamdan yığaraq az-az 3000 azn də sizə çatdıraram. Rayonda olarkən mal-qara saxlayırdım. Gələndə onları satdım ki, burada özümə bir ev qurum. Evi demək olar tikib qurtarmışdım. Qapı-pəncərəsini də qoymuşdum. Amma onlar razılaşmadı. Məni hədələdilər. Ötən gün isə gəlib evimi dağıtdılar. Hələ bu azmış kimi, polislər məni boğmağa da cəhd göstərdilər. Bütün bunlar məni o vəziyyətə çatdırdı ki, mən özümü yandırmaq istəyirdim. Evin bütün sənədləri, hətta bələdiyyə tərəfdən çıxarışı da var. Amma onlar buna məhəl qoymadan evi traktor ilə sökdülər".

Sözügedən şikayətin videosunu təqdim edirik:

Məsələ ilə bağlı Binəqədi rayon İcra Hakimiyyəti ilə əlaqə saxladıq. Rayon İcra Hakimiyyətindən Sonxeber.az-a verilən məlumata görə, vətəndaşın həyata keçirdiyi tikinti qanunsuz olub:

"Tərəfimizdən aparılmış araşdırmada aydın olmuşdur ki, ev tikilməsinə icazə ilə bağlı vətəndaşdan Şəhərsalma və tikinti məcəlləsinə uyğun olaraq sənədlərin Rayon İcra Hakimiyyətinə təqdim edilməsi tövsiyyə olunsa da, vətəndaş tərəfindən heç bir sənəd təqdim edilməmiş, qanunsuz halda tikintiyə davam etdiriləcəyini bildirib.
Məlumat üçün qeyd edək ki, yalnız vətəndaş tərəfindən torpaq sahəsinin çıxarışı və layihə təqdim edildikdən sonra məsələyə Rayon İcra Hakimiyyəti tərəfindən baxıla bilər. Əks halda aparılan tikinti qeyri-qanuni hesab edilir.
Qanunsuz tikilinin davam etdirilməsi üçün tələb olunan maliyyə ilə bağlı iddia isə tamamilə əsassızdır".

Lamiyə Məmmədova

Telegramda izləyin

instagramda izləyin