"Çin və Rusiya dünyanın super gücü olan Amerikaya qarşı birləşməyin yollarını axtarır"-Politoloq Rəyi

Rusiyanın "Triumf" S-400 zenit raket sistemlərinin ikinci komplekti Çinə çatdırılıb. Çin həmçinin Rusiyadan 120-dən artıq ən yeni idarə olunan zenit raketlərini əldə edib. Yüksələn xətlə inkişaf edən Rusiya-Çin strateji müttəfiqliyinin tərkib hissəsi olan bu tipli raketlərin alınmasına 2015- ci ildən başlanılıb. Qeyd edək ki, Rusiya ilə Çin arasında S-400 sistemlərinin Pekin tərəfindən alınmasını nəzərdə tutan müqavilə 2015-ci ilin aprelində bağlanıb. Hazırda Rusiya-Çin strateji müttəfiqliyi tədricən dünyada və Avrasiya məkanında geosiyasi proseslərə təsir edən mühüm amilə çevrilməkdədir. Elə S-400 zenit raket sistemləri ilə bağlı layihənin reallaşdırılması buna əyani sübutdir. Ümumiyyətlə, belə müttəfiqliyin möhkəmlənməsinin qlobal siyasət üçün önəmi nədən ibarət olacaq, maraqlı məqamlardandır.

Bununla bağlı Sonxeber.az-a danışan politoloq Qabil Hüseynli Çinin artıq dünyada super gücə çevrildiyini qeyd edib:

" Çin silahlanmaya böyük vəsait ayırır. Bununla yanaşı həm çox modern silahları özü hazırlaya bilir, həm də bəzi inkişaf edən ölkələrin silahlarını da "kopya"laya bilir. Amma elə silah növləri var ki, hələki Çində yoxdur. Çin həmin silah növlərinin bir qismini Rusiyadan əldə edir".

Politoloq Çin ilə Rusiya arasındakı adıçəkilən razılaşmanı ticarətdən daha çox, tərəflər arasında ikitərəfli tərəfdaşlıq, bir- birilərinə etimaq yaratmaq mühitinin formalaşdırılmasına xidmət etmək kimi dəyərləndirib:

"Belə görünür ki, bu iki dövlət əslində dünyanın super gücü olan Amerikaya qarşı birləşməyin yollarını axtarır. Hər iki dövlət qarşılıqlı hərbi-əməkdaşlıq və qarşılıqlı iqtisadi-əməkdaşılıq yolu ilə həmin ikili tərəfdaşlığı gücləndirir. Tez -tez İran İslam Respublikasını da tərəfdaşlığa qoşurlar. Həmin razılaşma dünyada müharibə riskini xeyli artırır. Elə ABŞ-ın baş katibi də təsadüfi deyil ki, açıqlamasında axirət gününün yaxınlaşdığını qeyd edib. O, bunu deyərkən çox ehtimalla ki, sürətli silahlanmanı nəzərdə tutub. Rusiya ilə Çin arasındakı hərbi-siyası əməkdaşlıq əslində kənardan baxanda lüzumsuz görünsə də, dünyada həmin ölkələrin fikrincə hərbi-siyası tarazlığın yaradılmasına yönəlib. Qeyd edim ki, bu istiqamətdə onlar səylərini getdikcə artırır".

Şəlalə Babayeva

Telegramda izləyin

instagramda izləyin