"Paşınyan nə qədər ağır psixoloji duruma düşdüyünü açıq nümayiş etdirdi"-RƏY

Xəbər verdiyimiz kimi, fevralın 15-də Münhen Təhlükəsizlik Konfransı çərçivəsində Ermənistan-Azərbaycan Dağlıq Qarabağ münaqişəsi ilə bağlı panel müzakirələri keçirilib.
Müzakirələrdə Azərbaycan prezidenti İlham Əliyev və Ermənistanın Baş naziri Nikol Paşinyan iştirak ediblər.

Debat Prezidentin tarixə ekskursiya etməsi ilə başlayıb və danışıqlar zamanı Ermənistanın Baş naziri Nikol Paşinyan ölkə başçısı İham Əliyevin siyasi cavabları və tarixi faktları ilə susdurulub.

Bununla bağlı Sonxeber.az-a danışan Milli Məclisin Hüquq siyasəti və dövlət quruculuğu komitəsinin üzvü, millət vəkili Fəzail Ağamalı fevralın 15-də Münhen Təhlükəsizlik Konfransı çərçivəsində keçirilən debatda ölkə Prezidentinin çox ciddi mənəvi-psixoloji üstünlüyə malik olduğunu qeyd edib:

"Mən cənab Prezidentin Ermənistanın Baş naziri ilə olan debatına diqqətlə baxdım. Bir daha Prezidentimizlə qürur duydum. Fəxr etdim ki, Azərbaycanın çox yüksək intellektə, eyni zamanda diplomatik gedişlərə malik, üstün cəhətlərini özündə daşıyan Prezidenti var. Debatda tarixi faktların ciddi auditoriyaya çatdırılması son dərəcə yüksək əhəmiyyət kəsb etdi. Ermənilərin Azərbaycana gəlməsi ilə bağlı bütün tarixi faktların lakonik şəkildə auditoriyanın diqqətinə çatdırılması əhəmiyyətli idi. Digər tərəfdən qeyd edə bilərəm ki, Prezident söyləmiş olduğu fikrə kifayət qədər inamlı idi və bu debatda çox ciddi mənəvi-psixoloji üstünlüyə malik idi. Prezidentin ingilis dilini yüksək səviyyədə bilməsi qarşısındakını çıxılmaz vəziyyətə saldı. Bu da Baş nazirin kəkələməsinə səbəb oldu. Paşınyan nə qədər ağır-psixoloji duruma düşdüyünü açıq nümayiş etdirdi".

Millət vəkili Fəzail Ağamalı Münhendə baş tutmuş debatda bütün mənalarda ölkə Prezidentinin diplomatik, psixoloji üstünlüyünü əvvəldən axıra qədər nümayiş etdirdiyini qeyd etdi:

"Debatda Qarabağın Azərbaycanın əzəli və əbədi torpağı olması həqiqəti və Azərbaycanın Dağlıq Qarabağda ikinci bir erməni dövləti yaradılmasına imkan verməyəcəyi dünya ictimaiyyətinə çatdırıldı. Düşünürəm ki, ölkə Prezidenti ermənilərin tarixinin saxta olduğunu bütün dünya auditoriyasına çatdıra bildi".

Millət vəkili həmçinin görüşdə beynəlxalq təşkilatlara, o cümlədən ATƏT-in Minsk qrupuna çağırışların olduğunu da vurğulayıb. O, bu danışıqlardan sonra işğal olunmuş yeddi rayonun azad olunması ilə bağlı Ermənistana qarşı diplomatik təzyiqlərin artacağının olduğunu da əlavə edib.

Şəlalə Babayeva

Telegramda izləyin

instagramda izləyin