"Ermənilər Azərbaycan cəmiyyətində çaşqınlıq yaratmaq üçün müxtəlif hiyləgər üsullara baş vururlar"-Deputat

Xəbər verdiyimiz kimi iyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutublar. Ermənistan tərəfinin törətdiyi təxribat nətıcəsındə Azərbaycan Ordusunun 4 hərbi qulluqçusu şəhid olub, 4-ü isə yaralanıb. Bu gün Ermənistan dövləti cəbhə ilə yanaşı sosial şəbəkələrdə təxribatlar törədir. Onlar Azərbaycan dilində saxta profillər açaraq guya şəhid sayının gizlədilməsi ilə bağlı yalan məlumatlar yayırlar. Onlar bizimlə heç bir əlaqəsi olmayan və köhnə foto, video yayaraq əhali arasında təşviş yaratmaq istəyirlər.

Bununla bağlı Sonxeber.az-a danışan deputat Ceyhun Məmmədov bildirib ki, bu gün ermənilər Azərbaycan cəmiyyətində çaşqınlıq yaratmaq üçün müxtəlif hiyləgər metodlardan istifadə edirlər: "Məqsədli şəkildə Azərbaycan tərəfinin itkilərinin çox olması barədə məlumatlar yayırlar. Bu cür məlumatları əsasən azərbaycanlıların adlarına yaratdıqları saxta profillər, əvvəldən hazırladıqları məlumatlar və videolar vasitəsilə edirlər. Əslində Müdafiə Nazirliyinin təqdim etdiyi videolardan da göründüyü kimi erməni tərəfinin itkiləri daha çoxdur, ancaq onlar bunun üstünü ört-basdır edir, gizlədirlər. Bu hücumlar nəticəsində erməni tərəfi çoxli itkilər verib. Ona görə hər birimiz itkilərlə bağlı məsələyə yanaşmada və paylaşımlarımızda diqqətli olmalıyıq. Əks halda ermənilərə öz məqsədlərinə çatmaqda kömək etmiş olacağıq. Bu isə yolverilməzdir. Ona görə hər birimiz diqqətli olmalıyıq. Döyüş bölgəsindən video və fotoların paylaşılmasından qəti çəkinməliyik. Müdafiə Nazirliyi uyğun gördüyü video və fotoları paylaşır. Dəfələrlə deyilməsinə baxmayaraq yenə bəzi vətəndaşlarımız tərəfindən müxtəlif videolar sosial şəbəkələrdə paylaşılır. Bu da ermənilərə kəşfiyyat üçün imkanlar yaradır.
Eyni zamanda dəqiqləşdirilməmiş heç bir məlumatı yaymaq olmaz. Hər kəs narahatdır. Yeni xəbər axtarışındadır. Bu məqsədlə düşmən ölkənin xəbər saytlarına müraciət edənlər də var. Düşmən tərəf bunu gözəl bilir və bir sıra hallarda ictimai rəyi çaşdırmağa çalışır. Görünən odur ki, erməni tərəf ictimaiyyətə düzgün məlumatlar təqdim etmir, əksinə çaşqınlıq yaradacaq məlumatlardan geniş istifadə edirlər".

Deputat qeyd edib ki, hər kəs sosial şəbəkələrdə paylaşımlarında diqqətli olmalıyıq: "Bu gün yuxarıda qeyd etdiyimiz kimi, ermənilər sosial şəbəkələrdə Azərbaycan adları ilə yanlış xəbərlər yayırlar. İctimai rəyi çaşdırmağa, vətəndaşlar arasında nifaq salmağa çalışırlar. Bəzən bilməyərəkdən bizim vətəndaşlar da həmin xəbərləri tirajlayırlar ki, bu da əlavə problemlər yaradır. Nəzər almalıyıq ki, sosial şəbəkələrimiz ermənilər tərəfindən ciddi izlənilir və təhlil edilir. Buna uyğun strategiya və yanaşma formalaşdırılır. Paylaşımlarımızda bu amili mütləq nəzərə almalıyıq. Ən vacib məsələlərdən biri də birlik və həmrəyliyimizi qorumaqdır. Hamının fikri ümumi problemimizə yönəlməlidir. Hadisələrin gedişindən qrup və partiya maraqları üçün istifadə edilməsi yol verilməzdir. Bu birliyi və həmrəyliyi poza biləcək paylaşımlardan hər birimzi çəkinməliyik. Çünki burada əsas məqsəd bu birlik və həmrəyliyi pozmaqdır".

Aysel Yusifqızı

Telegramda izləyin

instagramda izləyin