Virusa yoluxmanın 1000-i keçməsinin SƏBƏBLƏRİ

29 oktyabrda Azərbaycanda koronavirus (COVID-19) infeksiyasına 1015 yeni yoluxma faktı qeydə alınıb ki, bu da indiyəqədək ölkədə virusa yoluxmada rekord göstəricidir.

"Qarşıdakı soyuq günlərdə yoluxma sayında artım istisna edilmir"
Artımın səbəblərilə bağlı Modern.az-a danışan Tibbi Ərazi Bölmələrini İdarəetmə Birliyinin (TƏBİB) Elmi Komitəsinin sədri, professor Akif Qurbanov deyib ki, əsas səbəb insanların sadə gigiyenik qaydalara riayət etməməsidir:

"İndiki yoluxmalarda artımın bir neçə səbəbi var. Hələ bir müddət əvvəl soyuq aylarda yoluxma sayında artım gözlənildiyini açıqlamışdıq. Çünki payız-qış mövsümü bütün respirator infeksiyaların aktivləşdiyi dövrdür. Bunun da səbəbi odur ki, soyuq hava yuxarı tənəffüs yollarının müqavimət qabiliyyətini zəiflədir. Ona görə hava soyuduqca, bütün tənəffüs infeksiyaları-qrip, qripəbənzər xəstəliklər, o cümlədən, COVID-19 aktivləşir. Düzdür bizdə güclü soyuqlar müşahidə olunmur. Amma bütün dünyada soyuqlar düşdükcə, yoluxma artır. Bu baxımdan qarşıdakı soyuq günlərdə bizdə də yoluxma sayının artımı istisna edilmir".

İnsanlar koronavirusu unudub

Professorun sözlərinə görə, yoluxmanın artımın digər səbəbi biz özümüzük:

"Hazırda ölkəmizdə müharibə gedir, ordumuz irəliləyir. İnsnalar qələbələrə köklənib, bu fonda sanki psixolojik olaraq koronavirus ikinci plana keçib. Bundan qaynaqlanaraq, bəzən qorunma tədbirlərinə riayət etmədik, kütləvi toplaşmalarda maska taxmadıq, sosial məsafəni nəzərə almadıq. Bu da indiki nəticələrə gətirib çıxardı. Hələ də insanların koronavirusa laqeyd münasibətini görürük".

"Avtobuslardakı sıxlıqlarda mütləq maska taxılmalıdır"

Elmi Komitənin sədri qeyd edib ki, metro bağlı olduğundan avtobuslarda sıxlıq müşahidə edilir ki, bu da əlavə problemlər yaradır:

"İnsanların toplaşdığı ictimai nəqliyyat elə bir yerdir ki, orada sosial məsafənin gözlənilməsi mümkün olmur. Buna görə də insanlar maskadan mütləq istifadə etməlidirlər. Özü də maskadan düzgün istifadə etmək lazımdır. Maska gəzdirmək yox, maskanı ağzı və burnu örtəcək şəkildə taxmaq laızmdır. Deyirik maska taxmaq lazımdır, bəziləri çənəsində saxlayır. Maska tənəffüs yollarını örtməkdən ötrüdür, çənədə saxlamaqdan ötrü deyil. Yaxud soruşanda maska haradadır, deyir cibimdədir. Elə bilir ki, maska cibdədirsə, təhlükədən qorunur. Təəssüf edirik ki, bu cür səhv yanaşmalar mövcuddur. İnsanlar bilməlidir ki, maska düzgün istifadə edilmədiyi halda, yuxarı tənəffüs yolları ilə təmas edirsə, bu özü də yoluxmaya səbəb ola bilər. Əl gigiyenası, lüzumsuz təmaslardan, lüzumsuz görüşlərdən qaçınmaq, vacib olmadıqca evdən çıxamamaq lazımdır".

"Adi soyuqlama halında belə özünüzü təcrid edin"

Həkim tövsiyə edib ki, adi qrip halları müşahidə edildikdə belə, vətəndaşlar özünütəcrid qaydalarına riayət etsinlər:

"Bəzən insanlarda adi qripin əlamətləri hərarət, öskürək olu. İnsanlar belə əlamələtlərdə özünütəcrid etməlidirlər. O vaxta qədər ki, bunun adi qrip yaxud COVID-19 olduğunu dəqiqləşdirsinlər. Bəzi hallarda insanlar COVID-19-a yoluxur, amma düşünürlər ki, sadəcə soyuqlayıblar. Heç nəyə fikir verməyərək, adi qaydada işlərini davam etdirirlər. Beləcə onlarla insanın yoluxmasına səbəb olurlar. Ona görə də adi soyuqlama əlamətləri 3 gündən artıq davam edirsə, həkimlə məsləhətləşmə aparıb COVID-19 testi verməlidirlər".

Telegramda izləyin

instagramda izləyin