Aydın Tağıyev Azərbaycan ordusu üçün Zəfər Marşı yazdı- VIDEO

Bir aydan çoxdur ki, Azərbaycanın işğal altında olan torpaqlarını erməni terrorçularından təmizləmək uğrunda ikinci Vətən Müharibəsi davam edir. Şücaətlə irəliləyən Azərbaycan Ordusunun qələbə xəbərləri hər bir azərbaycanlı üçün qürur mənbəyinə çevrilib. Qəlbi vətən eşqilə döyünən xalqın hər bir nümayəndəsi öz sahəsində bacardığı qədər ordumuza mənəvi dəstək olmağa çalışır.
Sonxeber.az xəbər verir ki, belə təşəbbüslərdən biri də Mədəniyyət Nazirliyi Mədəniyyətşünaslıq üzrə Elmi-Metodiki və İxtisasartırma Mərkəzinin sektor müdiri Aydın Tağıyev tərəfindən gəlib. O, Azərbaycanın müzəffər ordusunun şərəfinə "Zəfər Marşı" şeirini yazıb. Marşın sözlərində ordumuz ulu türkün yadigarı kimi anılır, hər qələbə yeni nəsillərə daha firavan gələcəyin ümidi kimi təqdim edilir.

Müəllif bildirir ki, "Zəfər Marşı"nın Şuşada səslənəcəyi, qalib ordumuzun qələbə bayrağını müqəddəs torpaqlarımızda dalğalanacağı günü səbrsizliklə gözləyir:
"Bu bizim haqq davamızdır. Mən əminəm ki, tezliklə işğal altında olan torpaqlarımızın hər birində Azərbaycan torpağı dalğalanacaq. Arzum budur ki, qalib ordumun qələbə bayrağı Şuşadan Azadlıq Meydanına gətirilib qürurla nümayiş etdirilsin. Şeiri yazarkən, müzəffər ordumun xalqımıza yaşatdığı qürur hissi və qələbə sevincindən ruhlandım. Nə xoş mənə ki, qələbə qalasının bir daşı da mən oldum!"

"Zəfər Marşı"nın sözlərini təqdim edirik:

Qarabağ çağırır müzəffər ordum
Başqa yol qalmadı, bir yol var - savaş!
Yeni nəsillərə qalmasın deyə...
Bu ağrı, bu acı, bu qan qalx savaş!
Sən bizim fəxrimiz, həm qürurumuz.
Zəfərin mübarək şanlı ordumuz!
Axı sən qocaman türk oğlu, türksən.
Düşmənlər düşünsün, onlar ağlasın
Açsın qaraları başından Şuşa,
Müzəffər ordumuz zəfər qazansın.
Sən bizim fəxrimiz, həm qürurumuz.
Zəfərin mübarək şanlı ordumuz!
Artıq haqq günüdür, qisas vaxtıdır.
Düşmənin başına kül ələnəcək.
Qalxıb Azərbaycan ayaq üstədir.
Bu gecə yer qopub, göy dillənəcək!
Sən bizim fəxrimiz, həm qürurumuz.
Zəfərin mübarək şanlı ordumuz!
Sən bizim fəxrimiz, həm qürurumuz.
Zəfərin mübarək şanlı ordumuz!

Qeyd edək ki, mahnını müğənni Cavidan Fatihi ifa edir.

Həmin marşı təqdim edirik:

Telegramda izləyin