Füzuli Beynəlxalq Hava Limanı bölgəyə və Azərbaycana nələri vəd edir? - AÇIQLAMA

Xəbər verdiyimiz kimi, ötən gün Füzuli Beynəlxalq Hava Limanında əlamətdar hadisə baş verib. Belə ki, hava limanının istismara verilməsindən əvvəl Bakıdan uçan, "Azərbaycan Hava Yolları"na məxsus ən böyük "Airbus A340-500" tipli sərnişin təyyarəsi sınaq reysini həyata keçirərək, işğaldan azad olunan Qarabağın ilk hava limanında eniş edib. Bəs Füzuli Beynəlxalq Hava Limanı bölgəyə və Azərbaycana nələri vəd edir?

Mövzu ilə bağlı deputat Vahid Əhmədov bildirib ki, Füzuli Beynəlxalq Hava Limanının açılması Qarabağ zonası üçün çox böyük əhəmiyyət kəsb edən addımdır:

"Çünki həmin hava limanının açılması həm mülki, həm də yük təyyarələrinin istifadəsi üçün çox vacibdir. Qeyd etmək lazımdır ki, Qarabağ bölgəsində çox böyük işlər gedir. Cənab Prezidentin rəhbərliyi altında həmin ərazilərdə böyük tikinti işləri aparılır. Füzuli Beynəlxalq Hava Limanı, həmin bölgələrdəki tikinti işlərinin aparılması, müəyyən tikinti materiallarının oraya daşınması və bölgənin infrastrukturunun inkişafı məsələsində böyük yardımçı olacaq".

Deputat, həmçinin, qeyd edib ki, insanlarda Qarabağ regionuna maraq böyükdür:

"Həm daxildə, həm xaricdə Qarabağa olan marağı biz sezə bilirik. Xarici investorlarla yanaşı, qardaş Türkiyə dövlətinin şirkətləri də burada müəyyən tikinti-bərpa işlərini həyata keçirirlər. Ona görə də həmin hava limanının açılması bölgə üçün çox vacibdir. Onu da qeyd edim ki, Füzulidəki hava limanından sonra Zəngilan, Laçın və Kəlbəcərdə də aeroportlar tikiləcək. Qarşıda çox böyük və perspektivi yüksək olan işlərin həyata keçirilməsi gözlənilir. Hesab edirəm ki, Qarabağ bölgəsi 5-6 ildən sonra Azərbaycanın ən inkişaf etmiş və müasir standartlara uyğun ərazisi olacaq. Bölgənin həm iqtisadi, həm turizm, həm də kənd təsərrüfatı sahəsində gələcəyi çox parlaqdır. Qarabağ Azərbaycan üçün əhəmiyyət kəsb edən bölgədir. Qarabağı inkişaf etdirmək Azərbaycan üçün prioritet məsələdir.

Əsas məsələ budur ki, təhlükəsizliyin təmin edilməsində həmin bölgədə hər hansısa bir problem yaranmasın. Nəzərə alaq ki, sülhməramlıların nəzarət etdiyi bölgədə hələ də qanunsuz erməni diversantlar mövcuddur, ordumuza qarşı atəşkəsi pozurlar və 10 noyabr tarixli üçtərəfli bəyənata əsasən həmin silahlılar bölgədən çıxarılmayıb. Düşünürəm ki, bu məsələlər qısa müddətdə öz həllini tapacaq. Vaxt gələcək, orada heç kim olmayacaq. Yalnız Azərbaycanın ərazi bütövlüyünü tanıyan şəxslər bölgədə yaşayacaqlar. Qarabağın "status" məsələsi də birdəfəlik "zibilliyə gedəcək". Yəni bu məsələlərin həlli müəyyən qədər vaxt tələb edir. Ona görə də belə bir hava limanının açılması və oraya gediş-gəlişin olması istər mülki, istərsə də yükdaşıma sahəsində çox böyük inkişafa səbəb olacaq".

Saytımız deputat Ceyhun Məmmədovun fikirlərini də öyrənib.

Onun sözlərinə görə, həmin hava limanı işğaldan azad olunmuş ərazilərin iqtisadi yüksəlişində də böyük yardım edəcək:

"Bu, bölgədə yükdaşımalarla yanaşı, sərnişin daşımalarına da çox ciddi təsir göstərəcək. Bütövlükdə götürsək, Azərbaycanın Qarabağ və ətraf bölgələrində sürətli iqtisadi artım və iş yerləri olacaq. Həmçinin, əhalimizin Füzuliyə yaxın olan rayonlar, əsasən də Şuşa, Cəbrayıl və Şərqi Zəngəzurun digər yerlərinə hava nəqliyyatından istifadə edərək getməsində həmin hava limanı böyük rol oynayacaq. Digər məsələlərdən biri də turizm sektorudur".

Ceyhun Məmmədov qeyd edib ki, bu gün işğaldan azad olunmuş ərazilərdə, əsasən də Şərqi Zəngəzurda və Qarabağın özündə çox böyük turizm potensialı mövcuddur:

"Ümumiyyətlə, bu gün turizmin inkişafında hava nəqliyyatı çox ciddi rol oynayır. Onu da qeyd etmək lazımdır ki, bu ərazilər Zəngəzur dəhlizinə gedən nəqliyyat və dəmiryolunun üzərində yerləşir. Hesab edirəm ki, Füzuli Beynəlxalq Hava Limanı gələcəkdə, Zəngəzur dəhlizi işə düşəndən sonra həmin dəhlizin inkişafında öz sözünü deyəcək. Bölgədə sərnişinlərin və yüklərin daşınması ilə bağlı proseslər xeyli asanlaşacaq".

Rafi Müslümov

Telegramda izləyin

instagramda izləyin