"Bu addım sayəsində qəzetlərə yeni nəfəs veriləcək" - Bəhruz Quliyev

Azərbaycanda kütləvi informasiya məhsullarının, kitabların və dərslik komponentlərinin, həmçinin həmin məhsulların istehsalı və nəşri ilə bağlı kağızın idxalı və satışı əlavə dəyər vergisindən (ƏDV) azad edilib. Bundan sonra kitab, qəzet, jurnal və onların istehsalı ilə bağlı kağız məhsullarının idxal və satışına görə 18 faiz ƏDV tutulmayacaq. 18 faiz ƏDV-nin ləğv olunması çap medianın inkişafına necə təsir edəcək?

Bununla bağlı Sonxeber.az-a danışan "SƏS" Media Qrupun rəhbəri, Əməkdar jurnalist Bəhruz Quliyev açıqlama verib.

O bu qərarın çox böyük bir addım olduğunu bildirib:

"Bu addım sayəsində qəzetlərə yeni nəfəs veriləcək. Bununla bağlı Milli Məclisə dəfələrlə müraciət edilib və uzun müddət müzakirə olunub.

Bu məsələ hər zaman gündəmdə olmaqla yanaşı, Azərbaycan mediasını problem olaraq narahat edib.

Bütün dövrlərdə Azərbaycan mediasının problemləri Ulu Öndər və Prezident İlham Əliyev tərəfindən çox həssaslıqla qarşılanıb.

1998-ci ildə çox böyük bir borc yığılıb. 2000-ci ildə ölkəmizin mətbuat rəhbərləri Ulu Öndərə müraciət edərək Azərbaycan nəşriyyatına borclarının olduğunu bildiriblər. Bunun da səbəblərindən biri idxal olunan kağızın və məhsulların maya dəyərinin yüksək olması idi ki, bizə problem yaradırdı.

Ulu Öndər həmin zaman bizə həssaslıqla yanaşaraq, Azərbaycan mətbuatının nəşriyyata olan borcunu dondurdu. O dövrdə ən böyük borc "SƏS" qəzetində idi. Sonrakı zamanlarda isə borclar cənab Prezident tərəfindən ləğv edildi və dövlət hesabına ödənildi.

2002-ci ildə bizim əlavə dəyər vergisindən azad olunmağımızla bağlı qərar verildi. Biz bu günə qədər sadələşmiş vergi ödəyicisi sayılırdıq.
Bu gün isə idxal olunan kağızlar üzərindən əlavə dəyər vergisinin götürülməsi ilə artıq bu vergi bizim xaricdən aldığımız qəzet kağızlarının üzərindən götürülür. Bu, təqdirəlayiq bir addımdır.

Medianın İnkişafı Agentliyinin yaradılması son zamanlar mediaya olan xüsusi diqqətin nəticəsidir.

Qeyd edim ki, agentliyin yaranması ilə yeni bir qanun da qəbul edilib. İnkişaf getdikcə qanunların dəyişməsinə, yeni qanunlara ehtiyac yaranır.
Hesab edirəm ki, dövlətin bu sahədə verdiyi qərar medianin inkişafı üçün çox ciddi bir addımdır.

Kağız məhsullarının idxal və satışına görə 18 faiz ƏDV-dən azad olunması qəzetin maya dəyərinin aşağı düşməsi deməkdir. Bu da redaksiya əməkdaşlarının fəaliyyətini qurmaq üçün qəzet rəhbərlərinə köməkdir".

AYSEL QULİYEVA

Telegramda izləyin

instagramda izləyin