General Armen Arutyunyan zaminə buraxıldı...

İki aydan artıqdır ki, həbsdə olan erməni general-mayor Armen Arutyunyan zaminə buraxılıb.

Bu barədə generalın vəkili Akop Yenokyan NEWS.am-a müsahibəsində bildirib.

Xatırladaq ki, avqustun 17-də Milli Təhlükəsizlik Xidmətində araşdırılan cinayət işi çərçivəsində Raket və artilleriya qoşunlarının idarəsinin keçmiş rəisi, general-mayor Armen Arutyunyan saxlanılıb.

İstintaq zamanı müəyyən edilib ki, Armen Arutyunyan Müdafiə Nazirliyi ilə Ermənistanda fəaliyyət göstərən şirkət arasında bağlanmış müqaviləyə əsasən tədarük olunan məhsulun seçim komissiyasının sədri olmaqla təchizatçı şirkətin direktoruna və sahibinə yardımçı olub və o, bağlanmış müqavilənin predmetinə uyğun olmayan əmlakı qəbul edərək Müdafiə Nazirliyindən külli miqdarda qanunsuz pul qazanmaq üçün bilavasitə şirkətin niyyətlərini həyata keçirib. Bu məqsədlə təhvil verilmiş əmlakın taktiki-texniki göstəriciləri arasında uyğunsuzluğu gizlədərək müqavilədə nəzərdə tutulmuş müvafiq çaplı top mərmiləri əvəzinə, Müdafiə Nazirliyinə ümumi həcmdə müxtəlif tipli Çexiya istehsalı olan mərmilər təqdim ediblər. Onların ümumi məbləği 523 089 000 dram və ya 1 083 000 ABŞ dolları təşkil edib. Nəticədə, uçuş məsafəsi təmin olunmayıb, tələb olunan normadan artıq mərmilərin sayı qeydə alınıb, mərmilər Müdafiə Nazirliyinin sərəncamında olan top mərmilərinin ballistik xüsusiyyətlərinə və Ermənistan Respublikasının Silahlı Qüvvələrində qüvvədə olan parametrlərə uyğun gəlməyib. Nəticə etibarı ilə, mərmilərin istifadəsi vəziyyətində hədəfə atəş açmaq və döyüş tapşırıqlarını həll etmək mümkün olmayıb. Beləliklə, əməliyyat dövlət üçün ağır maddi nəticələrə səbəb olub.

Eyni zamanda məlum oldu ki, bu partiyadan olan mərmilər 44 günlük müharibə zamanı da istifadə olunub, nəticədə döyüş tapşırıqlarını həll etmək mümkün olmayıb. Eyni iş üzrə təchizatçı şirkətin direktoru və sahibi də ittiham olunub./Moderator

Telegramda izləyin