Hade və Lukas 20 il sonra yenidən birlikdə - FOTO

21 il öncə Braziliyadan dünyaya səs salan "Klon" serialının baş rol ifaçıları aralarındakı qalmaqallardan sonra yenidən bir araya gəliblər.

BiG.AZ xəbər verir ki, ssenarisi Qloriya Peresə, rejissor işi Jayme Monjardinə aid olan "Klon" teleserialının baş rol ifaçısı, Lukas, eləcə də Dieqo və Leo obrazlarını canlandıran Murilo Benisio və Hadeni oynayan Covanna Antonelli real həyatda sevgiliyə çevrilib ailə qursalar da, sonradan qalmaqallı şəkildə ayrılıblar.

Lakin bu yaxınlarda onlar "Rock in Rio" festivalında birlikdə görüntüləniblər.

Aktyorların həyatı barədə DAHA ƏTRAFLI

Xatırladaq ki, çəkilişindən bir neçə il sonra Azərbaycanda da nümayiş olunmağa başlayan serialın qəhrəmanları qısa zamanda hər kəsin sevimlisinə çevrilib. Müxtəlif obrazlarına görə fərqlənən "Klon" bu gün də izləyicilərinin yadındadır.

2001-ci ildə Braziliyada nümayiş olunan "Klon" teleserialı Şərq-Qərb fərqlilikləri, narkomaniya və insanın klonlaşdırılması kimi üç böyük mövzuyla dünyanın ən məşhur seriallarından birinə çevrilib. 2010-cu ildə Braziliyada serialın remeyki, yəni başqa aktyorlarla ikinci variantı çəkilsə də, gözlənilən uğuru əldə etməyb.

Daha öncə də qeyd etdiyimiz kimi, serialdan sonra dünya şöhrəti qazanan Murilo real həyatda Covanna ilə ailə qurub.

Bu, onun ikinci evliliyi olub. Həmin an aktyorun öncəki evlilikdən bir oğlu olub.

Lakin Hade və Lukasın real həyatdakı münasibətləri uzun çəkməyib və oğul övladları Pyetro dünyaya gəldikdən sonra cütlük ayrılıb.

Onların ayrılıqları da evlilikləri kimi bütün Braziliyaya səs salıb.

2007-ci ildə Covannanın İtaliya əsilli amerikalı iş adamı Roberto Lokaşio ilə təmtəraqlı toyu olub. Lakin Murilu Antonelliyə oğlu ilə birgə ABŞ-a, yeni həyat yoldaşının yanına köçməyə imkan verməyib. Nəticədə, uzanan məhkəmə proseslərinə görə Lokaşio ilə evlilik cəmi 4 ay davam edib.

Lakin sonralar Covanna xoşbəxtliyini rejissor Leonardu Noqeyra ilə tapıb. 2010-cu ildə onların əkiz qız övladları Antoniya və Sofiya dünyaya gəlib. Buna baxmayaraq, cütlüyün hələ də rəsmi nikahı yoxdur.

Bütün olanlardan sonra "Hade" və "Lukas"ın normal münasibət qurmaları təəccüblü görsənsə də, sosial şəbəkələrdə yayılan fotoda onlar çox mehriban görsənirlər. Şəkildə Murilu Covannanı dostcasına qucaqlayıb.

Daha bir maraqlı faktı da vurğulamaq istəyirik.

Aktyorların bir çox pərəstişkarlarının xəbəri yoxdur ki, Benisio "Hade"dən sonra Debora Falabella ilə eşq yaşayıb. Bu, filmdə Lukasın qızı Meli canlandıran aktrisadır.

Lakin Murilo və Debora arasındakı sevgi münasibətləri "Klon" serialı çəkildikdən 10 il sonra, "Braziliya prospekti" serialının çəkilişləri zamanı başlayıb. Bu qadınla Benisio 7 il vətəndaş nikahında olub. 2019-cu ildə isə cütlük heç bir səbəb açıqlamadan, ayrıldıqları barədə elan edib.

Bundan cəmi bir neçə gün sonra aktyor sosial şəbəkədə "Ana məhəbbəti" serialının ssenari müəllifi Manuela Dias ilə foto paylaşaraq sevgili olduqlarını nümayiş etdirib. Lakin bu münasibətlərin də ömrü qısa olub.

Hazırda Murilo iki oğluna atalıq edir və həyatı barədə mətbuata açıqlama verməkdən qaçır.

Telegramda izləyin