"Köçürmə əleyhinə papaqlar" interneti FƏTH ETDİ - FOTOLAR

Dərsdə köçürməyin yaxşı olmadığı məlum olsa da, "bacarana halaldı" deyənlər də var. Bununla mübarizədə müxtəlif üsullardan istifadə olunur, ən yaxşı yol isə müəllimin ayıq-sayıqlığıdır.

BiG.AZ xarici mətbuata istinadən oxuculara Fillipinin Leqaspi şəhərindəki kolleclərdən birində tətbiq olunan kreativ üsuldan danışmaq istəyir.

Belə ki, burada köçürmənin qarşısını almaq üçün tələbələr arasında xüsusi papaqlar dəbdədir. Onların şəkilləri internetdə virus kimi yayılaraq böyük marağa səbəb olub.

Hər şey haradan başlayıb?

Bikol Universitetinin Mühəndislik Kollecinin professoru Meri Coy Mandeyn-Ortis tələbələrdən köçürmənin qarşısını alacaq papaqlarda gəlməyi xahiş edib. O, 2013-cü ildə Taylandın təhsil ocaqlarında istifadə olunan kağız papaqları nəzərdə tutub. Müəllim bu fikri bəyənərək öz kollecində tətbiq etmək qərarına gəlib. Təklif tələbələrin də ürəyincə olub və onlar həvəslə müxtəlif formalı papaqlar hazırlayıblar. Dərsə "Halloween" maskalarında gələnlər də olub.

Müəllim kreativ tələbələrinin fotolarını çəkərək "Facebook"da paylaşdıqdan sonra şəkillər cəmi bir neçə günə minlərlə "like" və yüzlərlə şərh toplayıb, hətta mətbuatda da yayılmağa başlayıb.

Professor Mandeyn-Ortisin sözlərinə görə, "köçürmə əleyhinə papaqlar" tələbələrə imtahanları yaxşı verməyə kömək edib. Birincisi, ciddi nəzarətin olacağını bildikləri üçün onlar imtahana yaxşı hazırlaşıblar. Digər tərəfdən isə, sinif otağındakı pozitiv ab-hava da nəticəyə təsir edib. Görünür, "papaq"lı imtahanlar həmin kollecdə adətə çevriləcək.

Telegramda izləyin