"Adamyuyan maşın" istehsal olunacaq - FOTO

Yaponiyanın vanna otağı və mətbəx üçün innovativ texnologiyalar sahəsində ixtisaslaşmış "Science Co. Ltd." şirkəti insanları yuyacaq maşın istehsal etməyi planlaşdırır.

BiG.AZ xarici mətbuata istinadən xəbər verir ki, "adamyuyan maşın"lar ideyası yeni deyil.

Belə ki, daha öncə, 1970-ci ildə Yaponiyanın Osaka şəhərində keçirilən sərgidə elektronika nəhəngi olan "Sanyo Electric" şirkəti özünün "Ultrasəs vannası"nı təqdim edib. Bu, insanları tam avtomatik şəkildə 15 dəqiqə ərzində yuyan, masaj edən və qurudan maşındır.

Təəssüf ki, həmin zaman layihə satışa çıxarılmayıb, hazırda isə "Science Co. Ltd" texnoloji şirkəti bu ideyanı həyata keçirməyi və 2024-cü ilədək müasir "adamyuyan maşın"ı təqdim etməyi planlaşdırır.

"Project Usoyaro" texnologiyası insanlara hamamda daha mürəkkəb hisslər yaşatmaq üçün çox sayda idarə sensorları və süni intellekt sistemindən ibarətdir.

Mühəndislərin sözlərinə görə, burada məqsəd yalnız istifadəçi bədəninin tam şəkildə təmizlənməsi deyil, həm də maşın içərisində müalicəvi məkan yaratmaqdır: qurğunun içində siz suya davamlı ekranda görüntülərə baxaraq, rahatlaşdırıcı musiqi sədaları altında dincələ bilərsiniz.

"Adamyuyan maşın"ın 2025-ci ildə Osaka şəhərində keçiriləcək sərgidə nümayiş olunacağı gözlənilir.

Telegramda izləyin