Mahsun növbəti konsertinin müjdəsini verdi: Biletlər ucuz olacaq...

Xəbər verdiyimiz kimi, dünən məşhur türk müğənni Mahsun Kırmızıgül 17 il sonra ilk dəfə Azərbaycanda, Bakı Konqres Mərkəzində konsert verib.

BiG.AZ xəbər verir ki, böyük izdiham və duyğulu anlarla yadda qalan tədbirdə sənətçi növbəti konsertinin müjdəsini verib.

M. Kırmızıgül Bakıda ən böyük zalın hansı oluğunu soruşub. Cavabında "Baku Crystal Hall"un adı çəkilib. Müğənni növbəti konsertinin elə orada baş tutacağını və qiymətlərin daha ucuz və münasib olacağını deyib. Sənətçi konsertinə gəlmək istəyən hər kəsin iştirak edə bilməsi üçün bu qərara gəldiyini bildirib.

Bundan başqa, konsert zamanı tez-tez zəlzələ ilə bağlı mövzulara toxunan ifaçı bildirib ki, fəlakət bölgəsində olduğu müddət ərzində azərbaycanlı xilasediciləri də görüb. O, edilən yardımlara görə bütün Azərbaycan xalqına və ölkəmizin Prezidenti İlham Əliyevə dərin təşəkkürünü bildirib.

Həmçinin, sənətçi onun mahnılarını sevən şəhid Anar İsrafilovun atasını və övladlarını səhnəyə dəvət edərək, uşaqlarının təhsil aldıqları müddətdə bütün xərclərini öz üzərinə götürdüyünü elan edib.

M. Kırmızıgül səhnədə aldığı hədiyyəni geri qayıtdığı zaman zəlzələ bölgəsinə gedərək qarşısına çıxan ilk uşağa verəcəyini deyib.

İfaçı çıxışının sonunda "Annem-annem" mahnısını oxuyub və bu zaman göz yaşlarını saxlaya bilməyib. O, "İnstagram" paylaşımında da dünənki konsertin həyatının konserti olduğunu və heç bir konsertində bu qədər ağlamadığını etiraf edib:

Məlumat üçün onu da bildirək ki, sözügedən tədbirin 12 fevralda keçirilməsi planlaşdırılırdı. Lakin baş verən zəlzələ səbəbindən konsert təxirə salınmışdı.

Telegramda izləyin