Martın sonunda planetlərin "paradı" olacaq

Astronomlar bildirirlər ki, artıq martın sonunda Yupiter, Merkuri, Venera, Uran və Mars planetləri səmada bir cərgədə düzüləcək. Həmin günlərdə kosmik fəzada Günəş sistemindəki planetlərin nadir düzülüşü görünəcək, "parad" kimi tanınan astronomik hadisə baş verəcək. Bu hadisənin tam elmi adı olmasa da, bir çox insanlar planetlərin gecə səmasında düzülüşünü məhz "parad" termini ilə ifadə edirlər.

AZƏRTAC xarici KİV-lərə istinadla xəbər verir ki, alimlər martın 28-də günəşin qürubundan sonra səmada 5 planetin hamısının kifayət qədər aydın görünəcəyini bildirirlər. Bu halda ən parlaq planetlər - Merkuri və Yupiter üfüqdən yuxarıda görünəcək, eləcə də səmada bir qədər yüksəkdə Venera peyda olacaq. Mars bir qədər az görünəcək, Uranı görmək üçün isə durbindən istifadə etmək lazımdır.

Böyük Britaniyanın Edinburq Universitetindən Bet Billerin fikrincə, planetlərin vizual olaraq eyni xətdə göründükləri zaman meydana gələcək düzülüş iki və ya üç planet istisna olmaqla, qeyri-adi sayılmır. Ancaq beş planetin düzülməsi daha nadir bir hadisədir. Məsələn, planetlərin belə paradı 2022, 2020 və 2016-cı illərdə müşahidə olunub. Keçən il Yerin şimal yarımkürəsinin sakinləri Merkuri, Venera, Mars, Yupiter və Saturnun düzülüşünü izləyə biliblər.

Biller qeyd edib ki, səmada Venera və Yupiteri görmək çox asan olacaq. Əslində, son bir neçə həftə ərzində bu iki planet artıq bir-birinə yaxın məsafədə müşahidə olunub. Mars o qədər parlaq olmasa da, adi gözlə görünəcək. Merkuriyə gəlincə, o, yalnız səma çox açıq olduqda görünəcək. Ancaq Uranı durbinsiz və ya teleskopsuz aşkar etmək mümkün olmayacaq.

Eyni zamanda, astronomlar qeyd ediblər ki, bu planetlərin hamısını eyni anda aydın şəkildə görmək insanın olduğu məkandan, hündür ağaclar və binalar kimi maneələrin mövcudluğundan asılı olacaq. Əgər siz buna vaxt ayırsanız və durbindən də istifadə etsəniz, o zaman martın sonunda şahid olacağınız planetlərin paradı uzun müddət yaddaşınızda qalacaq. Bu ay nadir kosmik hadisəyə şahidlik edə bilməsəniz belə, astronomlar deyirlər ki, 2023-cü il üçün hələ planetlərin bir neçə paradı gözlənilir. Məsələn, apreldə Merkuri, Uran, Venera və Marsın bir sırada düzüldüyünü görmək olar və həmin ay başqa bir oxşar hadisə zamanı Mars, Venera, Uran və Merkurinin "paradı" olacaq.

Telegramda izləyin

instagramda izləyin